സിനിമ-സീരിയൽ നടി രഞ്ജുഷ മേനോന്റെ ആത്മഹത്യയിൽ ഞെട്ടി സിനിമ-സീരിയൽ ലോകം. രഞ്ജുഷ മേനോനെ തിരുവനന്തപുരം ശ്രീകാര്യത്തെ ഫ്ലാറ്റിൽ തൂങ്ങിമരിച്ച നിലയിലാണ് കണ്ടെത്തിയത്. സമീപകാലത്ത് സീരിയൽ രംഗത്ത് നിന്നും തുടർച്ചയായി വരുന്ന രണ്ടാമത്തെ ആത്മഹത്യാ വാർത്തയാണിത്. അടുത്തിടെയാണ് നടി അപർണ നായർ ആത്മഹത്യ ചെയ്തത്. ആഗസ്റ്റ് 31നാണ് കരമന തളിയൽ പുളിയറത്തോപ്പിലെ വീട്ടിൽ രാത്രി ഏഴരയോടെ അപർണയെ കിടപ്പു മുറിയിലെ ഫാനിൽ തൂങ്ങി മരിച്ചനിലയിൽ കണ്ടെത്തിയത്. ഭർത്താവ് സഞ്ജിത് കെട്ടഴിച്ച് കരമനയിലെ സ്വകാര്യ ആശുപത്രിയിൽ എത്തിച്ചെങ്കിലും മരണപ്പെടുകയായിരുന്നു.
അപർണയുടെ വിയോഗ വാർത്തയിൽ നിന്നും സീരിയൽ ലോകം കര കയറുമ്പോഴാണ് സീരിയൽ മേഖലയെ ഞെട്ടിച്ചുകൊണ്ട് മറ്റൊരു ആത്മഹത്യാ വാർത്ത കൂടി പുറത്ത് വന്നത്. തിരുവനന്തപുരം ശ്രീകാര്യത്തിനടുത്തുള്ള ഫ്ലാറ്റിലാണ് രഞ്ജുഷയും സീരിയൽ സംവിധായകനായ പങ്കാളി മനോജ് ശ്രീലകവും താമസിക്കുന്നത്. അവിടത്തെ കിടപ്പ് മുറിയിലെ ഫാനിൽ തൂങ്ങിയ നിലയിലാണ് ഇന്ന് രാവിലെ 9 മണിയോടെ രഞ്ജുഷയെ കണ്ടത്. ഷൂട്ടിങ്ങിനായി മനോജ് രാവിലെ പുറത്തേക്ക് പോയി.
തിരുവനന്തപുരത്ത് ഷൂട്ടിങ്ങ് പുരോഗമിക്കുന്ന ആനന്ദരാഗം എന്ന സീരിയലിൽ അഭിനയിക്കാൻ രഞ്ജുഷയ്ക്കും ഇന്ന് പോകണ്ടതായിരുന്നു. വരാത്തതിനെ തുടർന്ന് അണിയറ പ്രവർത്തകരാണ് ആദ്യം അന്വേഷിച്ചത്. പങ്കാളി മനോജ് വിളിച്ചിട്ടും ഫോൺ എടുക്കാതെ വന്നതോടെ ഫ്ലാറ്റിലെ സുരക്ഷാ ജീവനക്കാരൻ മുറിയിലെത്തി വിളിച്ച് നോക്കി.പിൻവശത്ത് വാതിൽ വഴി അകത്ത് കയറിയ മനോജാണ് മൃതദേഹം ആദ്യം കണ്ടത്. ആദ്യ വിവാഹം വേർപ്പെടുത്തിയ ശേഷമാണ് മനോജും രഞ്ജുഷയും ഒരുമിച്ച് ജീവിക്കാൻ തുടങ്ങിയത്.
2018 ൽ ഷാഫി സംവിധാനം ചെയ്ത മേരിക്കുണ്ടൊരു കുഞ്ഞാട് എന്ന സിനിമയിൽ ശ്രദ്ധേയമായ കഥാപാത്രം അവതരിപ്പിച്ച നടിയാണ് രഞ്ജുഷ മേനോൻ. ചിത്രത്തിൽ സലിം കുമാർ അവതരിപ്പിച്ച ലോനപ്പൻ എന്ന കഥാപാത്രത്തിന്റെ ഭാര്യയായിട്ടാണ് രഞ്ജുഷ അഭിനയിച്ചത്.സിറ്റി ഓഫ് ഗോഡ്, മേരിക്കുണ്ടൊരു കുഞ്ഞാട്, ലിസമ്മയുടെ വീട്, ബോംബെ മാർച്ച് 12, തലപ്പാവ്, വാധ്യാർ, വൺവേ ടിക്കറ്റ്, കാര്യസ്ഥൻ, അത്ഭുത ദ്വീപ് തുടങ്ങിയ സിനിമകളിലും 20 ലധികം സീരിയലുകളിലും അഭിനയിച്ചിട്ടുണ്ട്.