മഹായാനം’ നിര്‍മ്മിച്ച രാജന്‍; മക്കള്‍ക്ക് കൈ കൊടുത്ത മമ്മൂട്ടി; മധുരസമ്മാനം

മമ്മൂട്ടി ചിത്രം ‘കണ്ണൂർ സ്ക്വാഡ്’ മികച്ച പ്രതികരണവുമായി തിയറ്ററുകളില്‍ മുന്നേറുകയാണ്. ആദ്യദിനങ്ങളില്‍ തന്നെ ചിത്രം പ്രേക്ഷകര്‍ ഏറ്റെടുത്ത് കഴിഞ്ഞു. മമ്മൂട്ടിക്ക് ഒരു കടംവീട്ടല്‍ കൂടിയാകുകയാണ് ഈ ചിത്രം. 1989ൽ പുറത്തിറങ്ങിയ മമ്മൂട്ടിയുടെ മഹായാനം എന്ന ചിത്രം നിർമിച്ച സി.ടി. രാജന്റെ മക്കളാണ് ഈ സിനിമയ്ക്ക് പിന്നില്‍. സിനിമയുടെ സംവിധായകനായ റോബി വര്‍ഗീസ് രാജും തിരക്കഥാകൃത്തായ റോണി ഡേവി‍ഡ് രാജും. മഹായാനം അന്ന് പ്രശംസ നേടിിയെങ്കിലും സാമ്പത്തികമായി പരാജയപ്പെട്ടു.

നിര്‍മാതാവായ രാജന് വലിയ സാമ്പത്തിക നഷ്ടമായിരുന്നു സിനിമ. പിന്നെ രാജന്‍ സിനിമകള്‍ നിര്‍മിച്ചിരുന്നില്ല. വർഷങ്ങൾക്കിപ്പുറം അതേ നിർമ്മാതാവിന്റെ ഇളയ മകൻ സംവിധാനം ചെയ്യുകയും മൂത്ത മകൻ തിരക്കഥയെഴുതി അഭിനയിക്കുകയും ചെയ്യുന്ന ചിത്രം സ്വന്തമായി നിർമിച്ച് ആ സൗഹൃദത്തിന് പുതിയ കൂട്ടിച്ചേര്‍ക്കല്‍ നടത്തുകയാണ് മെഗാസ്റ്റാർ മമ്മൂട്ടി ഒരര്‍ത്ഥത്തില്‍. മമ്മൂട്ടിക്ക് മികച്ച നടനുള്ള സംസ്ഥാന അവാർഡ് നേടിക്കൊടുത്ത കഥാപാത്രമായിരുന്നു മഹായാനത്തിലേത്. സംവിധായകനായ റോബി രാജിന്റെ ഭാര്യ ഡോ. അഞ്ജു മേരിയാണ് ഈ അപൂർവ കാര്യം സമൂഹമാധ്യമങ്ങളിലൂടെ പങ്കുവച്ചത്.

മക്കളായ റോണിക്കും റോബിക്കുമൊപ്പമുള്ള അച്ഛന്റെ ചിത്രം പങ്കുവച്ചായിരുന്നു അഞ്ജുവിന്റെ കുറിപ്പ്. ‘‘ഈ ചിത്രം പോസ്റ്റ് ചെയ്യാനായതിൽ ഒരുപാട് സന്തോഷം. ഒത്തിരി സ്നേഹവും സമ്മിശ്ര വികാരങ്ങളും. 1989ൽ മമ്മൂട്ടി നായകനായ ‘മഹായാനം’ എന്ന ചിത്രം നിർമിച്ചത് പപ്പയാണ്. സിനിമ നിരൂപക പ്രശംസ നേടിയെങ്കിലും, അത് അദ്ദേഹത്തിന് വലിയ സാമ്പത്തിക നഷ്ടം വരുത്തി, ഒടുവിൽ നിർമാണം തന്നെ ഉപേക്ഷിക്കേണ്ടി വന്നു. എന്നാൽ അദ്ദേഹത്തിന്റെ സിനിമകളോടുള്ള ഇഷ്ടം അടുത്ത തലമുറ നന്നായി മുന്നോട്ടു കൊണ്ടുപോയി. 34 വർഷങ്ങൾക്ക് ശേഷം അദ്ദേഹത്തിന്റെ മൂത്ത മകൻ റോണി തിരക്കഥയെഴുതി, ഇളയവൻ റോബി സംവിധാനം ചെയ്തത് അതേ മെഗാസ്റ്റാർ മമ്മൂട്ടിയെ വച്ച്!! ജീവിതവൃത്തം പൂർത്തിയാവുന്നു.’’– ഡോ. അഞ്ജു മേരി പോൾ കുറിച്ചു.

പുതിയ നിയമം, ഗ്രേറ്റ്ഫാദർ, ക്യാപ്റ്റന്‍, വെള്ളം തുടങ്ങിയ സിനിമകളുടെ ഛായാഗ്രാഹകനായിരുന്ന റോബി വർഗീസ് രാജ് ആദ്യമായി സംവിധാനം ചെയ്ത ചിത്രമാണ് ‘കണ്ണൂര്‍ സ്ക്വാഡ്’. റോണി ഡേവിഡ് രാജും മുഹമ്മദ് ഷാഫിയും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. നൻപകൽ നേരത്ത് മയക്കത്തിനും റോഷാക്കിനും ശേഷം മമ്മൂട്ടി കമ്പനി നിർമ്മിച്ച ചിത്രമെന്ന പ്രത്യേകതയും കണ്ണൂർ സ്‍ക്വാഡിനുണ്ട്.

വാര്‍ത്തകളും വിശേഷങ്ങളും വിരല്‍ത്തുമ്പില്‍. മനോരമന്യൂസ് വാട്സാപ് ചാനലില്‍ ചേരാം. ഇവിടെ ക്ലിക് ചെയ്യൂ.