കേരളത്തിൽ നിന്ന് 18കോടി; ഇന്ത്യയിലാകെ 300 കോടി; ആകെ 7,000 കോടി; അവതാർ കുതിപ്പ്
ലോകത്തിലെ പണം വാരി ചിത്രങ്ങളുടെ പട്ടികയിലേക്കു കുതിക്കുകയാണ് ജയിംസ് കാമറണിന്റെ അവതാർ 2. ആഗോള തലത്തിൽ ഇതുവരെ 7000 കോടി രൂപയിലേറെ ചിത്രം നേടി എന്നാണ് റിപ്പോർട്ടുകൾ. ക്രിസ്മസ് അവധി കൂടി ആരംഭിച്ചതോടെ കലക്ഷനിൽ റെക്കോർഡ് തന്നെ സിനിമ സൃഷ്ടിക്കും എന്നാണ് വിലയിരുത്തൽ. ലോകത്ത് ഈ വർഷം ഏറ്റവുമധികം പണംവാരിയ ചിത്രങ്ങളുടെ പട്ടികയിൽ അഞ്ചാം സ്ഥാനത്താണ് അവതാർ 2 ഇപ്പോൾ. ടോം ക്രൂസ് ചിത്രം ടോപ്പ് ഗൺ മാവറിക് ആണ് ഒന്നാം സ്ഥാനത്ത്.
ഇന്ത്യയിൽ ആഗോള കലക്ഷൻ 300 കോടി പിന്നിട്ടു കഴിഞ്ഞു. കേരളത്തിലും വമ്പൻ സ്വീകാര്യതയാണ് ലഭിക്കുന്നത്. ഇതുവരെ 18 കോടിയാണ് കേരളത്തില്നിന്ന് അവതാർ 2 വാരിയത്. അതേസമയം ആഗോള കലക്ഷൻ 881.3 മില്യൻ ഡോളർ (7291 കോടി) പിന്നിട്ടുകഴിഞ്ഞു. അവതാർ ആദ്യഭാഗം നേടിയ ആഗോള കലക്ഷൻ 2.91 ബില്യൻ ഡോളറായിരുന്നു (ഏകദേശം 24,000 കോടി രൂപ). 460 മില്യൻ ഡോളർ (3800 കോടി രൂപയോളം) ചെലവിട്ടാണ് രണ്ടാംഭാഗം നിർമിച്ചിരിക്കുന്നത്.
