അമ്മയില്ലാത്ത ആനിക്ക് ഞാൻ അമ്മ; വിമര്ശനങ്ങള്ക്ക് പരോക്ഷ മറുപടിയും: കുറിപ്പ്
സന്തോഷവും പരിഭവവും പങ്കുവയ്ക്കാൻ അമ്മ അരികിൽ ഇല്ലാത്ത ആനിക്ക് താൻ അമ്മയാണെന്ന് ഷാജി കൈലാസ്. 24–ാം വിവാഹ വാർഷികത്തിൽ പങ്കുവച്ച കുറിപ്പിലാണ് ഷാജി ഇക്കാര്യം വെളിപ്പെടുത്തിയത്. ആനിക്ക് കരുത്തായി താൻ ഒപ്പമുണ്ടാകുമെന്നും ഷാജി കുറിച്ചു.
കുറിപ്പിന്റെ പൂർണരൂപം ഇങ്ങനെ: ഇണക്കങ്ങളും പിണക്കങ്ങളും നിറഞ്ഞ മനോഹരമായ 24 വർഷങ്ങൾ... ഞാനും എന്റെ ആനിയും ഒന്നിച്ചുള്ള മനോഹരമായ യാത്ര തുടരുകയാണ്... പരസ്പര ബഹുമാനത്തോടും സ്നേഹത്തോടും തുല്യതയോടും കൂടിയുള്ള ഈ യാത്രയിൽ കൂട്ടും കരുത്തുമായി നിൽക്കുന്ന ഏവർക്കും ഒത്തിരിയേറെ നന്ദി...
ഞാനീ ലോകത്ത് ഏറ്റവുമധികം ബഹുമാനിക്കുന്ന, ഒരു പുൽനാമ്പിനെ പോലും വേദനിപ്പിക്കുവാൻ ആഗ്രഹിക്കാത്ത ആനിയെ സ്വന്തമാക്കിയ എന്നെ സംബന്ധിച്ചിടത്തോളം ഈ ലോകത്തിലെ ഏറ്റവും വലിയ ഭാഗ്യവാൻ ഞാൻ തന്നെയാണ്. സന്തോഷങ്ങളും പരിഭവങ്ങളും പങ്കുവയ്ക്കുവാൻ അമ്മ അരികിലില്ലാത്ത ആനിക്ക് ഞാൻ ഒരു അമ്മയാണ്...അവളുടെ എല്ലാമാണ്.
വളച്ചൊടിക്കപ്പെട്ട പലതിനും മുന്നിൽ അവൾ തളർന്നേക്കാം... സങ്കടപ്പെട്ടേക്കാം...പക്ഷേ പതറാതെ തളരാതെ അവൾക്ക് കരുത്തായി ഇന്നും എന്നും ഞാൻ കൂടെയുണ്ടാകും...
ലോകം മുഴുവൻ വിഷമിക്കുന്ന ഈ ഒരു വേളയിൽ ഞങ്ങൾക്കും ആഘോഷങ്ങൾ ഇല്ല...വേഗം ലോകം മുഴുവൻ സുഖം പ്രാപിക്കട്ടെ...എല്ലാവർക്കും നന്മയും ആരോഗ്യവും നേരുന്നു....