റൈഡര്മാര്ക്കൊപ്പം ബൈക്ക് പറപ്പിച്ച് മാളവിക; രാജ്യത്തെ ആദ്യ ഫോർമുല വൺ ട്രാക്കില്; വിഡിയോ
രാജ്യത്തെ ആദ്യ ഫോർമുല വൺ ട്രാക്കിലൂടെ ബൈക്ക് പറപ്പിച്ച് നാടി മാളവിക മോഹനന്. മികച്ച റൈഡേർസിനൊപ്പമാണ് താരം റേസില് ഒരു കൈ പരീക്ഷിച്ചത്.
ഡോറിനകത്ത് പുതിയ കഴിവുകൾ പരീക്ഷിക്കുന്ന ഈ കാലത്ത് ഔട്ട് ഡോറിൽ പരീക്ഷിച്ച പുതിയ കാര്യത്തെക്കുറിച്ച് പറയാം എന്നു പറഞ്ഞുകൊണ്ടാണ് ചിത്രങ്ങളും വിഡിയോയും താരം പോസ്റ്റ് ചെയ്തത്. ബൈക്കിനോടുള്ള തന്റെ പ്രണയം ഒരു പടികൂടി മുന്നോട്ടു പോയെന്നും കഴിഞ്ഞ ജൂണിൽ മികച്ച റൈഡേർസിനൊപ്പം ഇന്ത്യയിലെ ആദ്യത്തെ ഫോർമുല വൺ ട്രാക്ക് ആയ ബുദ്ധ് ഇന്റർനാഷണലിൽ ബൈക്കോടിച്ചെന്നും മാളവിക ഇന്സ്റ്റഗ്രാമില് കുറിച്ചു.
അതുവരെ സാധാരണ ബൈക്ക് മാത്രം ഓടിച്ചിരുന്ന തനിക്ക് അവരുടെ വേഗത്തിനൊപ്പം എത്താനായില്ലെങ്കിലും ട്രാക്കിലൂടെയുള്ള ബൈക്ക് ഓടിക്കൽ ആവേശം നൽകി. ആ ദിവസവും ആ നിമിഷവും മിസ് ചെയ്യുന്നുണ്ടെന്നുണ്ടെങ്കിലും അതിനെക്കുറിച്ച് ആലോചിക്കുമ്പോൾ സിരകളിൽ ആവേശം നിറയുമെന്നും മാളവിക കുറിച്ചു.
പ്രശസ്ത ഛായാഗ്രാഹകൻ കെയു മോഹനന്റെ മകളായ മാളവിക പട്ടം പോലെ എന്ന ചിത്രത്തിലൂടെയാണ് സിനിമയില് അരങ്ങേറ്റം കുറിച്ചത്. പ്രശസ്ത ഇറാൻ സംവിധായകൻ മജീദ് മജീദിയുടെ ആദ്യ ഇന്ത്യൻ സംവിധാന സംരംഭമായ ബിയോണ്ട് ദ് ക്ലൗഡ്സ് എന്ന ചിത്രത്തിലെ നായികയാണ്. മോഡലിങ്ങിലും സജീവമാണ്.