മണിയൻപിള്ള രാജുവിനോട് തനിക്ക് പ്രണയമുണ്ടായിരുന്നില്ലെന്ന് നടി ഷക്കീല. അങ്ങനെയൊരു പ്രണയലേഖനം താൻ അയച്ചിട്ടുമില്ല. വ്യാജവാർത്തയാണ് അതെന്നും അവർ പറഞ്ഞു. അമ്മ സുഖമില്ലാതെ കിടന്ന സമയത്ത് അദ്ദേഹം സാമ്പത്തികമായി സഹായിച്ചു. പ്രണയം ഒന്നും അതിൽ തോന്നിയിരുന്നില്ല. മറ്റൊരാളുമായി താൻ അക്കാലത്ത് പ്രണയത്തിൽ ആയിരുന്നുവെന്നും അവർ വെളിപ്പെടുത്തി.
ഇത്തരം വാർത്തകളോട് മനപൂർവം പ്രതികരിക്കാത്തതാണെന്നും അവർ കൂട്ടിച്ചേർത്തു. മുൻപ് മണിയൻപിള്ള രാജുവിനോട് ഇക്കാര്യം മാധ്യമങ്ങൾ ചോദിച്ചപ്പോൾ അദ്ദേഹവും നിഷേധിച്ചിരുന്നു.
ഛോട്ടാമുംബൈയുടെ ചിത്രീകരണം നടക്കുന്നതിനിടെയാണ് ഷക്കീലയുടെ അമ്മ രോഗബാധിതയായത്. അടിയന്തരമായി ശസ്ത്രക്രിയ വേണ്ടി വന്നതിനെ തുടർന്നായിരുന്നു മണിയൻ പിള്ള രാജു സഹായിച്ചത്. അഭിനയിക്കേണ്ട രംഗങ്ങളുടെ ചിത്രീകരണം പൂർത്തിയാകാതിരുന്നിട്ടും പ്രതിഫലം അദ്ദേഹം മുൻകൂറായി നൽകുകയായിരുന്നു.