എന്റെ നേരെ തോക്ക് ചൂണ്ടി 'തോർ' അഭിനയം പഠിച്ചു; സൗഹൃദം പങ്കിട്ട് തമ്പി ആന്റണി
ലോകം മുഴുവൻ ആരാധകരുള്ള സൂപ്പർ ഹീറോ ചിത്രമാണ് അവഞ്ചേഴ്സ്. അവഞ്ചേഴ്സിന്റെ ഏറ്റവും പുതിയ ചിത്രമായ അവഞ്ചേഴ്സ്: എൻഡ് ഗെയിം റെക്കോർഡുകൾ തകർത്ത് തിയറ്ററുകളിൽ പ്രദർശനം തുടരുമ്പോൾ കുറിപ്പുമായി നിർമാതാവും നടനുമായ തമ്പി ആന്റണി. 'തോർ' എന്ന കഥാപാത്രത്തെ അവതരപ്പിച്ച ക്രിസ് ഹെംസ്വേർത്തുമായുള്ള സൗഹൃദത്തെക്കുറിച്ചാണ് തമ്പി കുറിപ്പിൽ പറയുന്നു.
ക്രിസ് ആദ്യമായി അഭിനയിച്ചത് തനിക്കൊപ്പമാണെന്ന് തമ്പി പറയുന്നു. എനിക്ക് നേരെ തോക്ക് ചൂണ്ടിയാണ് സൂപ്പർ സ്റ്റാർ ക്രിസ് അഭിനയം തുടങ്ങിയതെന്ന് പറഞ്ഞാൽ ആരെങ്കിലും വിശ്വസിക്കുമോ എന്ന് അദ്ദേഹം ചോദിക്കുന്നു.
കാഷ് എന്ന ചിത്രത്തിലാണ് തമ്പി ക്രിസിനൊപ്പം അഭിനയിച്ചത്. സ്റ്റീഫൻ മിൽബൺ സംവിധാനം ചെയ്ത ചിത്രത്തിൽ ബഹദുർജിത് തെജീന്ദർ പ്രീത് സിങ് എന്ന കഥാപാത്രത്തെയാണ് അദ്ദേഹം അവതരിപ്പിച്ചത്. ഷോൺ ബീൻ, മൈക്ക് സ്റ്റാർ തുടങ്ങിയവരും ചിത്രത്തിൽ അഭിനയിച്ചിരുന്നു.
തമ്പിയുടെ ഫെയ്സ്ബുക്ക് കുറിപ്പ് വായിക്കാം:
ചില സൗഹൃദങ്ങൾ അങ്ങനെയാണ്. ഒരുപാടടുത്താലും പിന്നെ നമുക്കെത്തപ്പെടാന് പറ്റാത്തത്ര ഔന്നിത്യങ്ങളില് എത്തിയിരിക്കും. ഒരുപക്ഷേ അവര് നമ്മളെ മറന്നിട്ടില്ലായിരിക്കും. എന്നാലും സാഹചര്യത്തിന്റെയും പ്രശസ്തിയുടെയും കടലാഴങ്ങളില്പ്പെട്ട് നട്ടം തിരിയുന്നതാവാം. എന്തായാലും ഒരിക്കലും എത്തിപ്പിടിക്കാനാവാത്ത ഉയരങ്ങളിലേക്കു എത്തിനില്ക്കുന്ന ആ കൂട്ടുകാരനില്. ആ വലിയ നടന്റെ ഉയർച്ചയിൽ ഞാനിന്നഭിമാനിക്കുന്നു.
ആദ്യ സിനിമയില്ത്തന്നെ എന്റെ നേരെ തോക്ക് ചൂണ്ടിയാണ് ഇന്നത്തെ ഈ സൂപ്പർ സ്റ്റാർ ക്രിസ് ഹെംസ്വേർത്ത് അഭിനയം തുടങ്ങിയതെന്ന് പറഞ്ഞാൽ ആരെങ്കിലും വിശ്വസിക്കുമോ.
ഒന്നിച്ചു ഷിക്കാഗോയിലെ തെരുവീഥികളിലൂടെ എത്രയോ ദിവസം കറങ്ങി നടന്നിരുന്നു. മറ്റൊരു ഹോളിവുഡ് താരം ഷോണ് ബീനുമായി ബാറുകളിൽ പോയി മദ്യപിച്ചിട്ടുണ്ടെന്ന് പറഞ്ഞാലോ. ഒന്നും എനിക്കുപോലും വിശ്വസിക്കാൻ ബുദ്ധിമുട്ടുണ്ട്. അത്രയ്ക്കും ഉന്നതങ്ങളിലാണ് അവരൊക്കെ. എന്നാലും ഇനിയുമൊരിക്കല് കണ്ടുമുട്ടുമെന്ന പ്രതീക്ഷയോടെ.