മന്ത്രകോടി മറന്നു, മണിയുടെ വിവാഹചിത്രത്തിലെ രസകരമായ കഥ

ആരാധകമനസിലെ വിങ്ങുന്ന ഓർമയാണ് അന്തരിച്ച നടന്‍ കലാഭവൻ മണി. ആ വേർപാട് ഉൾക്കൊള്ളാൻ ഇപ്പോഴും പ്രയാസമാണ്. ഓർത്തിരിക്കാൻ ഒട്ടേറെ അഭിനയ ഹൂർത്തങ്ങൾ സമ്മാനിച്ച ആ നടന്റെ വിവാഹ വാർഷികമായിരുന്നു കഴിഞ്ഞ ദിവസം. മണിയുടെ വിവാഹ ചിത്രം പങ്ക് വച്ച് സഹോദരൻ ആർഎൽവി രാമകൃഷ്ണൻ ആ ദിനത്തിലെ രസകരമായ ഒരു സംഭവം ഓർത്തെടുക്കുന്നു. 

 

രാമകൃഷ്ണന്റെ കുറിപ്പ് വായിക്കാം:

 

മണി ചേട്ടന്റെ വിവാഹ വാർഷികമാണ്. ഈ ഫോട്ടോ കാണുമ്പോൾ രസകരമായ ഒരു സംഭവം ഇന്നലെ നടന്നതു പോലെ ഓർമ വരുന്നു. മണി ചേട്ടന്റെയും ചേടത്തിയമ്മയുടെയും പുറകിൽ നിൽക്കുന്നവരുടെ മുഖഭാവം ശ്രദ്ധിച്ചു നോക്കുക! കണ്ണാടി വച്ച്, മുല്ലപ്പൂ തലയിൽ വച്ചത് അമ്മയും, ഓറഞ്ച് സാരി ഉടുത്തത് ഞങ്ങളുടെ മൂത്ത സഹോദരിയും പച്ച സാരി ഉടുത്തത് മൂത്ത ചേടത്തിയമ്മയും ആണ്.

 

താലി കെട്ട് കഴിഞ്ഞ്  മന്ത്ര കോടി അന്വേഷിച്ചപ്പോൾ കാണുന്നില്ല. ആകെ ടെൻഷനായി ജനങ്ങളും, സിനിമാ താരങ്ങളും തിങ്ങി കൂടി നിൽക്കുന്നു; കല്യാണതിരക്കിൽ മന്ത്രകോടി വീട്ടിൽ നിന്ന് എടുക്കാൻ മറന്നു പോയി. ഒടുവിൽ മന്ത്രകോടി എടുക്കാൻ ഞാൻ വീട്ടിലേക്ക് ഓടി. അവിടെ ചെന്നപ്പോൾ വാതിൽ താക്കോലിട്ടു പൂട്ടിയിരിക്കുന്നു. ഒടുവിൽ അമ്മിക്കുഴഎടുത്ത് അടുക്കള വാതിലിന്റെ താക്കോൽ തല്ലി പൊളിച്ച് മന്ത്രകോടിയും എടുത്ത് കല്യാണം നടക്കുന്ന കോസ്മോസ് ക്ലബിലെത്തി. വിവാഹം കഴിഞ്ഞ് ഈ കാര്യം ചേട്ടനോടു പറഞ്ഞപ്പോൾ കൂട്ട ചിരിയായി.