SCENE സീനാണ് മച്ചാ! ക്യൂട്ടല്ല,ഇവിടെ ആക്ഷനാണേയ്....

സൂര്യയെ നായകനാക്കി ജിത്തു മാധവൻ സംവിധാനം ചെയ്യുന്ന തമിഴ് ചിത്രം ‘SCENE’ന്റെ ആദ്യ സിംഗിൾ പുറത്തിറങ്ങി. നസ്രിയയുടെ ആക്ഷന്‍ മോഡിലാണ് പ്രേക്ഷകര്‍ അന്തിച്ചു നില്‍ക്കുന്നത്. സുഷിൻ ശ്യാം സംഗീതം ഒരുക്കുന്ന ചിത്രത്തിലെ ആദ്യ ഗാനമായ ‘Aathi Iva Yarraa’ ആണ് ഇപ്പോൾ പ്രേക്ഷകരിലേക്കെത്തിയിരിക്കുന്നത്. വേഗമേറിയ താളവും വ്യത്യസ്തമായ അവതരണവുമുള്ള ഗാനമാണ് പുറത്തിറങ്ങിയിരിക്കുന്നത്.

സൂര്യ, നസ്രിയ നസീം, നസ്‌ലെൻ എന്നിവർ പ്രധാന വേഷങ്ങളിലെത്തുന്ന ചിത്രത്തിന്റെ ആദ്യ ഗാനത്തിലൂടെ നസ്രിയയുടെ കഥാപാത്രത്തിന്റെ ആദ്യ കാഴ്ചയും ലഭിക്കുന്നുണ്ട്. ഗാനരംഗത്തിൽ നസ്രിയയെ വ്യത്യസ്തമായ ഗെറ്റപ്പിലും അവതരണത്തിലുമാണ് കാണാനാകുന്നത്. വീഡിയോ ഗെയിം കഥാപാത്രത്തിന്റെ രൂപഭാവങ്ങളോടെയുള്ള രംഗങ്ങളും ഗാനത്തിന്റെ പ്രത്യേകതയാണ്.

‘രോമാഞ്ചം’, ‘ആവേശം’ എന്നീ ചിത്രങ്ങളിലൂടെ ശ്രദ്ധേയനായ ജിത്തു മാധവന്റെ തമിഴിലെ അരങ്ങേറ്റ ചിത്രമാണ് ‘SCENE’. സൂര്യയുമായി ജിത്തു മാധവൻ ആദ്യമായി ഒന്നിക്കുന്ന ചിത്രമെന്ന പ്രത്യേകതയും സിനിമയ്ക്കുണ്ട്. ചിത്രത്തിന്റെ കഥയെയും കഥാപാത്രങ്ങളെയും കുറിച്ചുള്ള കൂടുതൽ വിവരങ്ങൾ അണിയറപ്രവർത്തകർ പുറത്തുവിട്ടിട്ടില്ല.

ചിത്രത്തിന്റെ ടൈറ്റിൽ ടീസറിൽ സൂര്യയെ ഡിഎസ്പി ഇൻബരാജ് എന്ന പൊലീസ് ഉദ്യോഗസ്ഥനായാണ് അവതരിപ്പിച്ചിരിക്കുന്നത്. മാസ് ആക്ഷനും കോമഡിക്കും പ്രാധാന്യമുള്ള എന്റർടെയ്നറായിരിക്കും ചിത്രമെന്ന സൂചനയാണ് ടീസർ നൽകിയത്.

നസ്‌ലെനും ചിത്രത്തിൽ നിർണായക വേഷത്തിലാണ്. ടൈറ്റിൽ ടീസർ പുറത്തുവന്നതിന് പിന്നാലെ നസ്‌ലെൻ ചിത്രത്തിൽ വില്ലൻ കഥാപാത്രത്തെയാണോ അവതരിപ്പിക്കുന്നത് എന്ന തരത്തിൽ ചർച്ചകൾ ഉയർന്നിരുന്നെങ്കിലും, കഥാപാത്രത്തെക്കുറിച്ചുള്ള ഔദ്യോഗിക സ്ഥിരീകരണം അണിയറപ്രവർത്തകർ നൽകിയിട്ടില്ല.

ചിത്രത്തിന് സംഗീതം ഒരുക്കുന്നത് മലയാളത്തിലെ ശ്രദ്ധേയ സംഗീതസംവിധായകനായ സുഷിൻ ശ്യാം ആണ്. ജിത്തു മാധവനൊപ്പം ‘ആവേശം’ എന്ന ചിത്രത്തിൽ പ്രവർത്തിച്ച സുഷിൻ ആദ്യമായി തമിഴിൽ സംഗീതം ഒരുക്കുന്ന ചിത്രം കൂടിയാണ് ‘SCENE’. ‘Aathi Iva Yarraa’ ഗാനത്തിന്റെ വരികളും ആലാപനവും രാജ് പ്രിയനാണ് നിർവഹിച്ചിരിക്കുന്നത്. ഗാനത്തിന്റെ തെലുങ്ക് പതിപ്പ് ‘Ammo Idi Evarraa’ എന്ന പേരിലും പുറത്തിറങ്ങിയിട്ടുണ്ട്.

നസ്രിയയ്ക്കും നസ്‌ലെനും പുറമെ ആനന്ദ് രാജ്, ലാൽ, രാജ് പ്രിയൻ തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നു. വിനീത് അഗസ്ത്യനാണ് ഛായാഗ്രഹണം. അജ്മൽ സാബുവാണ് എഡിറ്റർ. അശ്വിനി കാലേ പ്രൊഡക്ഷൻ ഡിസൈനറും ചേതൻ ഡി’സൂസ ആക്ഷൻ ഡയറക്ടറുമാണ്. തമിഴ് സംഭാഷണങ്ങൾ ഒരുക്കുന്നത് ഡ്രാവിഡ് സെൽവമാണ്.

പ്രഖ്യാപനം മുതൽ തന്നെ വലിയ ശ്രദ്ധ നേടിയിരിക്കുന്ന ‘SCENE’ നവംബർ 6ന് ദീപാവലി റിലീസായി ആഗോളതലത്തിൽ തിയേറ്ററുകളിലെത്തും. ആദ്യ സിംഗിൾ പുറത്തിറങ്ങിയതോടെ ചിത്രത്തിന്റെ സംഗീത പ്രമോഷനും സജീവമായിരിക്കുകയാണ്.