ആഡംബരത്തിനും വിനോദയാത്രയ്ക്കും പണം കണ്ടെത്താൻ മോഷണം; കാഞ്ഞിരപ്പള്ളിയിൽ 3 പേർ പിടിയിൽ

വിനോദയാത്രകൾ നടത്തുന്നതിനും ആഡംബര ജീവിതം നയിക്കുന്നതിനും വേണ്ടി വീട് കുത്തിത്തുറന്ന് സ്വർണ്ണവും പണവും കവർന്ന കേസിൽ മൂന്ന് കൗമാരക്കാർ പിടിയിൽ. കോട്ടയം കാഞ്ഞിരപ്പള്ളിയിലാണ് സംഭവം. പിടിയിലായവരിൽ രണ്ടുപേർ 17 വയസ്സ് മാത്രം പ്രായമുള്ള പ്രായപൂർത്തിയാകാത്ത കുട്ടികളാണ്. ഇവരോടൊപ്പമുണ്ടായിരുന്ന കൊടുവന്താനം കൊട്ടയപ്പറമ്പിൽ അനിൽകുമാറിന്റെ മകൻ അജിത് അനിൽ എന്ന യുവാവും കാഞ്ഞിരപ്പള്ളി പൊലീസിന്റെ പിടിയിലായിട്ടുണ്ട്.

കഴിഞ്ഞ മെയ് 24-ന് രാത്രിയാണ് കേസിനാസ്പദമായ സംഭവം നടക്കുന്നത്. കാഞ്ഞിരപ്പള്ളി ആനക്കൽ പൊടിവട്ടം റോഡിലുള്ള ആന്റണി ജോസഫ് കല്ലമ്പള്ളിയുടെ വീട് കുത്തിത്തുറന്നാണ് ഇവർ കവർച്ച നടത്തിയത്. വീട്ടുകാർ ബെംഗളൂരുവിലേക്ക് യാത്ര പോയ വിവരം മനസ്സിലാക്കിയാണ് സംഘം കവർച്ച ആസൂത്രണം ചെയ്തത്.പിടിക്കപ്പെടാതിരിക്കാൻ പർദ്ദയും മുഖംമൂടിയും ധരിച്ചാണ് സംഘം എത്തിയത്. വീടിന്റെ മുൻവാതിൽ കുത്തിപ്പൊളിച്ച് അകത്തുകയറിയ പ്രതികൾ 75,000 രൂപയും മൂന്ന് പവൻ സ്വർണ്ണാഭരണങ്ങളും കവരുകയായിരുന്നു.

മോഷണം നടന്ന പ്രദേശത്തെ സിസിടിവി (CCTV) ദൃശ്യങ്ങൾ പരിശോധിച്ചപ്പോഴാണ് പ്രതികൾ കാറിലാണ് എത്തിയതെന്ന്  വ്യക്തമായത്. തുടർന്ന് കാർ കേന്ദ്രീകരിച്ച് നടന്ന അന്വേഷണത്തിലാണ് പ്രതികൾ വലയിലാകുന്നത്. ഇവർ മുൻപും ഇത്തരത്തിൽ വിവിധ മോഷണക്കേസുകളിൽ ഉൾപ്പെട്ടിട്ടുണ്ടോ എന്ന് പൊലീസിന് സംശയമുണ്ട്.