മണിപ്പൂരില് സര്ക്കാരുണ്ടാക്കാന് കോണ്ഗ്രസിന് ക്ഷണം. ശനിയാഴ്ചക്കകം ഭൂരിപക്ഷം തെളിയിക്കാന് ഗവര്ണര് നജ്മഹെപ്തുള്ള നിര്ദേശിച്ചു. കേവല ഭൂരിപക്ഷമുണ്ടെന്ന് ചൂണ്ടിക്കാണിച്ച് ബി.ജെ.പി നേതാക്കള് വീണ്ടും ഗവര്ണറെ കാണും. ഗോവയില് മുഖ്യമന്ത്രിയായി മനോഹര് പരീക്കര് നാളെ സത്യപ്രതിജ്ഞ ചെയ്യും. മാപുസ മണ്ഡലത്തിലായിരിക്കും പരീക്കര് ജനവിധി തേടുക.
തിരഞ്ഞെടുപ്പ് ഫലം പുറത്തുവന്നപ്പോള് മണിപ്പൂരിലും ഗോവയിലും ഏറ്റവും വലിയ ഒറ്റകക്ഷിയായ കോണ്ഗ്രസ് നിയമസഭാകക്ഷിനേതാവിനെ തീരുമാനിക്കുന്ന തിരക്കിലായിരുന്നു. എന്നാല് ഇതേസമയത്ത് സര്ക്കാര് രൂപീകരണത്തിനുള്ള ചരടുവലിയിലായിരുന്നു ബി.ജെ.പി. മണിപ്പൂരില് പ്രാദേശികപാര്ട്ടികളായ എന് പി.പിയേയും എന് പിഎഫിനേയും കൂടെകൂട്ടിയാണ് ബി.ജെ.പി കേവല ഭൂരിപക്ഷം തികച്ചത്.ഇരുപാര്ട്ടികള്ക്കും നാല് അംഗങ്ങള് വീതം. ഇതിനു പുറമെ ഓരോ അംഗങ്ങള് വീതമുള്ള എല്ജെപിയും ത്രിണമൂല് കോണ്ഗ്രസും ബി.ജെ.പിയ്ക്ക് പിന്തുണ അറിയിച്ചു. മാന്ത്രിക സംഖ്യയായ മുപ്പത്തിഒന്നില് എത്തിപ്പിടിക്കാന് കോണ്ഗ്രസിന് ഇനി മൂന്നുപേരുടെ പിന്തുണവേണം.
ഭൂരിപക്ഷം തെളിയിക്കുന്നതിന് പുറമെ കൂടെയുള്ളവരുടെ കൊഴിഞ്ഞുപോക്കും മണിപ്പൂരില് കോണ്ഗ്രസിന് തലവേദനയാകുന്നു. രാഷ്ട്രീയ നീക്കങ്ങള്ക്കുശേഷം ഗോവയില് ചിത്രം ഏതാണ്ട് വ്യക്തമായി. മൂന്നുസീറ്റുകള് വീതമുള്ള മഹാരാഷ്ട്രവാദി ഗോമതക് പാര്ട്ടിയുടെയും ഗോവ ഫോര്വേഡ് പാര്ട്ടിയുടേയും പിന്തുണഉറപ്പാക്കാന് ബി.ജെ.പിയ്ക്ക് കഴിഞ്ഞു. പണാധിപത്യം കൊണ്ട് ബി.ജെ. പി ജനാധിപത്യത്തെ കൊല്ലുകയാണെന്ന് കോണ്ഗ്രസ് ആരോപിച്ചു. ഏറ്റവും വലിയ ഒറ്റകക്ഷിയായ കോണ്ഗ്രസിനെ സര്ക്കാര് രൂപീകരിക്കാന് ക്ഷണിക്കാത്ത ഗവര്ണറുടെ നടപടി ശരിയല്ലെന്നും കോണ്ഗ്രസ് കുറ്റപ്പെടുത്തി.