ടീം ഇന്ത്യയിലെ രസികനാണ് യുസ്വേന്ദ്ര ചഹലെന്ന കാര്യത്തിൽ ആർക്കും തർക്കമില്ല. ക്യാപ്റ്റൻ കോലിയെ മുതൽ ആരെയും ട്രോളും ചഹൽ. അതിന്റെയെല്ലാം പണി ചഹലിന് ദേ പിറന്നാൾ ദിവസം കിട്ടിയിരിക്കുകയാണ്. 29-ാം പിറന്നാൾ ആഘോഷിക്കുന്ന ചഹലിന് വീരേന്ദർ സെവാഗാണ് ട്രോളിൽ പൊതിഞ്ഞ ആശംസ അറിയിച്ചത്. ലണ്ടൻ ലോകകപ്പിൽ നിന്നുള്ള ചിത്രമാണ് വീരു തെരഞ്ഞെടുത്തത്. 'ഇത് തന്റേടം, ഇതിന് ആളുകൾ പൈസ തരും' എന്നായിരുന്നു ആശംസയ്ക്കൊപ്പം സെവാഗ് കുറിച്ചത്.
വെള്ളക്കുപ്പികൾക്കരികെ വിശ്രമിക്കുന്ന ചഹൽ അന്നും ട്രോളിനിരയായിരുന്നു.
സുരേഷ് റെയ്ന, രോഹിത് ശർമ്മ, ചേതേശ്വർ പൂജാര എന്നിവരും പിറന്നാൾ ആശംസകൾ നേർന്നു. തൊട്ടുപിന്നാലെ കുഞ്ഞനിയന് ആശംസയെന്ന് ശിഖർ ധവാനും കുറിച്ചു.
ചഹൽ ടിവിയിലെ രസകരമായ നിമിഷങ്ങൾ ചേർത്ത് വച്ചാണ് ബിസിസിഐ ചഹലിന് ഹാപ്പി ബർത്ത്ഡേ അറിയിച്ചത്. ചഹൽ നല്ലൊരു ചെസ് കളിക്കാരനായിരുന്നുവെന്ന രഹസ്യമാണ് ഐസിസി ചഹൽ ആരാധകർക്ക് സർപ്രൈസ് ആയി നൽകിയത്.