ലോക്സഭ തിരഞ്ഞെടുപ്പിന് കൗണ്ട് ഡൗണ്‍ തുടങ്ങികഴിഞ്ഞു. 40 ദിവസങ്ങള്‍ക്കപ്പുറം കേരളവും വിധിയെഴുതും. രാജ്യം ആര് ഭരിക്കണം എന്നതാണ് തീരുമാനിക്കപ്പെടുന്നത് എങ്കിലും, സംസ്ഥാന സര്‍ക്കാരിന്‍റെ വിലയിരുത്തല്‍കൂടിയാകുമോ ഈ ജനവിധി എന്നത് നിര്‍ണായകമാണ്. സര്‍ക്കാരിന്‍റെ വിലയിരുത്തലാകുമെന്ന് തന്നെയാണ് സിപിഐ സംസ്ഥാന സെക്രട്ടറി ബിനോയ് വിശ്വം ഇന്ന് പറഞ്ഞത്. സിപിഎം നേതാക്കളും സ്ഥാനാര്‍ഥികളില്‍ ചിലരും കഴിഞ്ഞ ദിവസങ്ങളില്‍ പറ‌‍ഞ്ഞതും അതുതന്നെയാണ്. മാസപ്പടി ഉള്‍പ്പെടെയുള്ള വിഷയങ്ങളില്‍നിന്ന് ശ്രദ്ധതിരിപ്പിക്കാന്‍ എത്ര ശ്രമിച്ചാലും അനുവദിക്കില്ലെന്ന് പ്രതിപക്ഷനേതാവ് വി.ഡി. സതീശന്‍ പറയുന്നു. ഇ.പി. ജയരാജന്‍റെ ബിജെപി അനുകൂല പ്രസ്താവനയും പ്രതിപക്ഷം രാഷ്ട്രീയ ആയുധമായി ഏറ്റെടുത്തുകഴിഞ്ഞു.
