ദുബായ് ഷോപ്പിങ് ഫെസ്റ്റിവലി(ഡിഎസ്എഫ്)ൻ്റെ ഭാഗമായി സംഘടിപ്പിച്ച റീട്ടെയില് ജ്വല്ലറി ക്യാംപെയിനില് 50 ശതമാനത്തിലേറെ വിജയികളും വിനോദ സഞ്ചാരികളാണെന്ന് ദുബായ് ഗോള്ഡ് & ജ്വല്ലറി ഗ്രൂപ്പ് അധികൃതര്. സ്വര്ണ സമ്മാനം സ്വന്തമാക്കിയതിലേറെയും ഉപയോഗത്തിൽ മുന്നിട്ടു നിൽക്കുന്ന ഇന്ത്യന് സമൂഹവും. ദുബായിലെ റീട്ടെയില് ജ്വല്ലറി ഷോറൂമുകളിലെത്തുന്ന വിനോദ സഞ്ചാരികളുടെ എണ്ണം വര്ധിച്ചതായും കണക്കുകൾ പറയുന്നു.
വില ഏവർക്കും പ്രാപ്യമായ നിലയിലെത്തിയത് സ്വര്ണം വാങ്ങുന്നവരുടെ ആകെ എണ്ണത്തിലും വര്ധനവുണ്ടാക്കി. 34 കിലോഗ്രാം സ്വര്ണ സമ്മാനം വന് സമ്മാനപദ്ധതിയെന്ന പേരില് ശ്ര്ദ്ധേയമായി.
ദുബായ് ഡ്യൂട്ടി ഫ്രീയിലൂടെ നഗരത്തിലെത്തിയ വിദേശ വിനോദ സഞ്ചാരികളും ദുബായ് ഗോള്ഡ് & ജ്വല്ലറി ഗ്രൂപ്പിൻ്റെ ഡിഎസ്എഫ് ക്യാംപെയിനില് വലിയ തോതില് തന്നെ പങ്കാളികളായി.
റീട്ടെയില് ജ്വല്ലറി പ്രമോഷന് ക്യാംപെയിനും വിജയമാണ്. കഴിഞ്ഞ ഡിസംബര് 26 ന് ആരംഭിച്ച ക്യാംപെയിന് ഇൗ മാസം 28 നാണ് സമാപിക്കുന്നത്. റാഫിള് കൂപ്പണ് വിജയികളുടെ വിശദാംശങ്ങള് വിലയിരുത്തുമ്പോഴും വലിയൊരു ശതമാനം വിജയികളും വിനോദ സഞ്ചാരികളാണെന്ന് വ്യക്തമാണ്. ഡി എസ് എഫ് വേളയില് കൂടുതല് വിനോദ സഞ്ചാരികള് റീട്ടെയില് ജ്വല്ലറി ഷോറൂമുകളില് എത്തിയെന്നാണ് തെളിയിക്കുന്നത്. ഇതില് കൂടുതല് പേരും ജിസിസി, യൂറോപ്പ്, ദക്ഷിണേഷ്യ, മിന, അമേരിക്ക, ഓസ്ട്രേലിയ തുടങ്ങിയ രാജ്യങ്ങളില് നിന്നുളളവർ. 500 യുഎഇ ദിര്ഹമിൻ്റെ സ്വര്ണാഭരണങ്ങള് വാങ്ങുന്ന ഉപയോക്താവിന് ഒരു റാഫിള് കൂപ്പണ് ലഭിക്കുമ്പോള് 500 ദിര്ഹമിന്റെ ഡയമണ്ട് ആഭരണങ്ങളോ, വജ്രാഭരണമോ, വാച്ചോ വാങ്ങുന്നവര്ക്ക് രണ്ട് റാഫിള് കൂപ്പണുകളും ലഭിക്കും. ഈ റാഫിള് കൂപ്പണുകള് സ്വന്തമാക്കുന്നവര്ക്ക് പ്രതിദിന റാഫിള് നറുക്കെടുപ്പിൽ ഭാഗ്യം പരീക്ഷിക്കാന് അവസരമുണ്ടാകും. പ്രമോഷനില് പങ്കാളികളായ എല്ലാ ജ്വല്ലറി ഔട്ട്ലെറ്റുകള്, കിയോസ്ക്കുകള്, ദുബായ് ഡ്യുട്ടി ഫ്രീ ടെര്മിനലുകള് എന്നിവിടങ്ങളില് നിന്നും റാഫിള് കൂപ്പണുകള് ലഭ്യമാണ്.
പുതുവത്സരത്തിന്റെ തുടക്കം മുതല് ജ്വല്ലറി റീട്ടെയില് രംഗത്ത് ദൃശ്യമായ വില്പനയിലെ വളര്ച്ച ഈ ഡിഎസ്എഫ് സീസണില് വലിയ ചലനമാണുണ്ടാക്കിയതെന്ന് ദുബായ് ഗോള്ഡ് & ജ്വല്ലറി ഗ്രൂപ്പ് ചെയര്മാന് തൗഹീദ് അബ്ദുല്ല പറഞ്ഞു. റീട്ടെയില് ജ്വല്ലറി ഷോറൂമുകളില് വലിയ തോതില് വില്പന വര്ധിച്ചതായി സ്ഥാപനങ്ങളും വ്യക്തമാക്കുന്നു. വില്പനയുടെ വ്യാപ്തിയിലും ടിക്കറ്റ് വിൽപനയിലും ഇടപാടുകളുടെ എണ്ണത്തിലും അനുഗുണമായ വളര്ച്ച പ്രകടമാണ്. 34 കിലോഗ്രാം സ്വര്ണ സമ്മാനം വന് പദ്ധതിയെന്ന പേരില് ഇതിനകം ശ്രദ്ധേയമായി. ഇത്തവണ മൂന്ന് വിജയികളാണ് ദിനംപ്രതി സ്വര്ണ സമ്മാനവുമായി മടങ്ങുന്നത്. ഓരോ ഉപയോക്താവും തങ്ങളുടെ ജീവിതം തന്നെ മാറ്റി മറക്കുന്ന ഈ സുവര്ണാവസരത്തെ വലിയ അവസരമായി കരുതുന്നുവെന്നും തൗഹീദ് അബ്ദുല്ല പറഞ്ഞു. വിലയില് ഉണ്ടായ ഈ ആകര്ഷകമായ കുറവ് ക്രിസ്മസ്, പുതുവര്ഷാഘോഷ വേളകളില് മികച്ച വില്പനയ്ക്ക് കാരണമായി.
78 ദശലക്ഷത്തിലേറെ രാജ്യാന്തര യാത്രക്കാര് കടന്നുപോകുന്ന ലോകത്തെ തന്നെ ഏറ്റവും തിരക്കേറിയ വിമാനത്താവളമായ ദുബായ് രാജ്യാന്തര വിമാനത്താവളത്തിലെ ഡ്യൂട്ടി ഫ്രീ ഔട്ട്ലെറ്റുകളില് പ്രമോഷന് സൗകര്യം ഒരുക്കിയത് ദുബായ് വഴി യാത്ര ചെയ്യുന്ന ട്രാന്സിറ്റ് യാത്രക്കാര്ക്ക് വരെ ക്യാംപെയിനില് പങ്കാളികളാകാന് അവസരം സൃഷ്ടിച്ചു. വിജയികളുടെ ജീവിതം തന്നെ മാറ്റിമറിക്കുന്ന ഡിഎസ് എഫ് പ്രമോഷന് ലോകമെങ്ങുമുളള ആളുകളെ ആകര്ഷിച്ചതായി ദുബായ് വിനോദ സഞ്ചാര വിപണന കേന്ദ്രത്തിന് കീഴിലുളള ഏജന്സിയായ ദുബായ് ഫെസ്റ്റിവല് ആൻഡ് റീട്ടെയില് എസ്റ്റാബ്ലിഷ്മെൻ്റിൻ്റെറീട്ടെയില് ആൻഡ് സ്ട്രാറ്റജിക് അലയന്സസ് എക്സിക്യൂട്ടീവ് ഡയറക്ടര് സഈദ് മുഹമ്മദ് മീസാം അല് ഫലാസിയും ഡിഎസ്എഫ് സംഘാടകരും പറഞ്ഞു.
600 ല് അധികം അംഗങ്ങള് ഉള്പ്പെടുന്ന ദുബായിലെ ഗോള്ഡ് ആൻഡ് ജ്വല്ലറി ഇന്ഡസ്ട്രിയുടെ ട്രേഡ് ബോഡിയാണ് ദുബായ് ഗോള്ഡ് ആൻഡ് ജ്വല്ലറി ഗ്രൂപ്പ്. ബുളളിയന് ജ്വല്ലറി മാനുഫാക്ചര്, ഹോള്സെയില്–റീട്ടെയില് തുടങ്ങി ജ്വല്ലറി രംഗത്തെ സമഗ്ര മേഖലകളെയും പ്രതിനിധീകരിക്കുന്ന ഗ്രൂപ്പാണ് ഇത്.