റമസാനില് ശ്രദ്ധിക്കേണ്ട ആരോഗ്യകാര്യങ്ങളെ കുറിച്ച് ഒമാന് ആരോഗ്യമന്ത്രാലയം മാര്ഗനിര്ദേശങ്ങള് പുറത്തിറക്കി. നോമ്പെടുക്കുന്ന പ്രായമായവരെയും കുട്ടികളെയും പ്രത്യേകം നിരീക്ഷിക്കണമെന്നും നിര്ദേശമുണ്ട്.
പ്രായമുള്ളവർക്കും കുട്ടികള്ക്കും നോമ്പുകാലത്ത് ബുദ്ധിമുട്ട് അനുഭവപ്പെടാൻ സാധ്യതയുള്ളതിനാല് അവരെ പ്രത്യേകം നിരീക്ഷിക്കണം. ഇഫ്താറിനും അതിന് ശേഷവും ആവശ്യത്തിന് വെള്ളം കുടിക്കുന്നുണ്ടെന്ന് ഉറപ്പാക്കുകയും വേണം. എന്തെങ്കിലും ബുദ്ധിമുട്ട് അനുഭവപ്പെട്ടാൽ ഉടൻ നോമ്പുമുറിപ്പിക്കണമെന്നും വ്യക്തമാക്കുന്നു. വൃക്കസംബന്ധമായ പ്രശ്നങ്ങളുള്ളവർ നോമ്പെടുക്കുന്നതിന് മുന്പ് ഡോക്ടറുടെ ഉപദേശം തേടിയിരിക്കണം. സോഡിയം അടങ്ങിയ ഉപ്പ്, ബേക്കിങ് പൗഡർ എന്നിവ അടങ്ങിയതും പായ്ക്ക് ചെയ്ത ഭക്ഷണ പദാർഥങ്ങളും കഴിക്കുന്നത് കുറയ്ക്കണം.
പൊട്ടാസ്യം കൂടുതലായി അടങ്ങിയ ഏത്തപ്പഴം, ഈന്തപ്പഴം, ആപ്രികോട്ട്, ഉണക്ക മുന്തിരി എന്നിവയുടെ ഉപയോഗവും ഫോസ്ഫറസ് ധാരാളം അടങ്ങിയ മാട്ടിറച്ചി, മുട്ടയുടെ വെള്ള, ധാന്യമാവ്, കാർബണേറ്റഡ് ഡ്രിങ്ക്സ്, തൈര് എന്നിവയുടെ ഉപയോഗവും വൃക്ക സംബന്ധമായ പ്രശ്നങ്ങൾ കുറക്കുന്നതിന് സഹായകമാണ്. മൂന്ന് ലിറ്റർ വരെ വെള്ളം കുടിച്ചാൽ മാത്രമേ ശരീരത്തിൽനിന്നുള്ള ജലനഷ്ടത്തിന് പകരമാവൂ. പുകവലിയും ശീഷ ഉപയോഗവും ഒഴിവാക്കണം. വ്യായാമവും അനിവാര്യമാണ്. രക്തദാനവും ആരോഗ്യത്തിനും ഗുണപ്രദമാണെന്ന് മന്ത്രാലയം ചൂണ്ടിക്കാണിക്കുന്നു.