ഗള്ഫ് രാജ്യങ്ങളില് റമസാന് വ്രതാരംഭം ശനിയാഴ്ച. വ്യാഴാഴ്ച വൈകിട്ട് സൌദിയിലും പരിസര പ്രദേശങ്ങളിലും മാസപ്പിറവി കണ്ടതായി വിവരം ലഭിക്കാത്തതിനാല് വെള്ളിയാഴ്ച ശഅബാന് 30 പൂര്ത്തിയാക്കി ശനിയാഴ്ച റമസാന് ഒന്നായിരിക്കുമെന്ന് സൌദി സുപ്രീം കോര്ട്ട് അറിയിച്ചു. പ്രാര്ഥനകളുടെ രാപ്പകലുകളെ വരവേല്ക്കാന് വിശ്വാസി സമൂഹം ഒരുങ്ങി കഴിഞ്ഞു.
വിശുദ്ധ ഖുര്ആന്റെ അവതരണവും നിര്ബന്ധ വ്രതാനുഷ്ഠാനവും കൊണ്ട് അനുഗ്രഹിച്ച മാസമാണ് റമസാന്. ഇനിയുള്ള ഒരു മാസം ഉപവാസത്തിന്റെയും ഉപാസനയുടെയും നാളുകള്. ഭൗതിക ലോകത്തിലെ ആകര്ഷണങ്ങളില്നിന്ന് മനസിനെ വിലക്കി ആത്മീയതയുടെ ഉയരങ്ങളിലേക്ക് കൊണ്ടുപോകുന്ന പുണ്യ ദിനങ്ങള്. ഈ മാസത്തില് ജീവിച്ചിരിക്കുന്നവര് വ്രതാനുഷ്ഠാനത്തിലൂടെ പാപമുക്തി നേടിയിരിക്കണമെന്ന് സാരം. പാപരഹിതമായ ജീവിതം നയിക്കുക വഴി വ്യക്തിയിലും കുടുംബത്തിലും സമൂഹത്തിലും നന്മയുടെ പ്രസരണം ഉണ്ടാകണം എന്നാണ് ഇതിലൂടെ ഉദ്ദേശിക്കുന്നത്.
ദൈവത്തിന്റെ വിധിവിലക്കുകള് അനുസരിച്ച് പുലര്ച്ചെ മുതല് സന്ധ്യ വരെ അന്ന പാനീയങ്ങള് വെടിയുന്നതോടെ ഒരു ദിവസത്തെ വ്രതാനുഷ്ഠാനം പൂര്ത്തിയാകും. അഞ്ചു നേരത്തെ നമസ്കാരത്തിലും അനുബന്ധ പ്രാര്ഥനകളിലും റമസാനിലെ പ്രത്യേക രാത്രി നമസ്കാരമായ തറാവീഹിലും പങ്കെടുത്ത്, പുണ്യമാസത്തെ രാപ്പകലുകളെ ഭക്തിസാന്ദ്രമാക്കാന് കാത്തിരിക്കുകയാണ് വിശ്വാസികള്.