വളർത്തു മൃഗങ്ങളെയും കൂട്ടി വാഹനയാത്ര ചെയ്യുന്നത് പലർക്കും ഇഷ്ടമുള്ള കാര്യമാണ്. കാറിൽ പ്രിയ നായകളെയും പൂച്ചകളെയും കൂട്ടി സവാരിക്കിറങ്ങുന്ന വിഡിയോകൾ സമൂഹമാധ്യമങ്ങളിൽ പ്രചരിക്കാറുണ്ട്. ഇപ്പോഴിതാ വേറിട്ട ഒരു യാത്രയാണ് ചർച്ചാവിഷയം. ഇവിടെ വളർത്തു മൃഗമായ പശുവിനൊപ്പം ഉടമ യാത്രചെയ്തത് ബൈക്കിലാണ്. പശുവിനെ ബൈക്കിന്റെ മുന്നിലിരുത്തി ബൈക്കില് കൂളായി സവാരി നടത്തുകയാണ് ഇൗ യുവാവ്. പാകിസ്ഥാനിൽ നിന്നുള്ള ഇൗ വിഡിയോ സമൂഹമാധ്യമങ്ങളിൽ വൈറലാണ്.
പാകിസ്ഥാനിലെ ഒരു സിവിൽ ഉദ്യോഗസ്ഥൻ ട്വിറ്ററിൽ പങ്കുവച്ച വിഡിയോയാണ് മറ്റുള്ളവരും ഏറ്റെടുത്തത്. പ്രത്യേകം തയാറാക്കിയ കുപ്പായമൊക്കെ അണിയിച്ച ശേഷമാണ് പശുവിനെ ബൈക്കിലിരുത്തിയത്. തലയൊഴിച്ച് പശുവിന്റെ ശരീരം പൂർണമായും മറച്ച ശേഷമാണ് ബൈക്ക് യാത്ര. പശുവാകട്ടെ ഉടമയ്ക്കൊപ്പം കൂളായി ബൈക്ക് യാത്ര ആസ്വദിക്കുകയാണ്. എന്നാൽ അപകടകരവും മനുഷ്യത്വരഹിതവുമാണെന്ന് വാദിച്ചും ചിലർ രംഗത്തെത്തിയിട്ടുണ്ട്.