മഹാപ്രളയം തീര്‍ത്ത കനത്ത ദുരിതങ്ങളില്‍ നിന്ന് കേരളം കരകയറുകയാണ്. ഉറ്റവരെയും ഉടയവരെയും വീടും സ്ഥലവും ഒക്കെ നഷ്ടപ്പെട്ട് പലരും ദുരിതാശ്വാസ ക്യാമ്പുകളില്‍ കഴിയുകയാണ്. നാടിന്റെ പല ഭാഗത്തു നിന്നുമുള്ളവര്‍ ഇവര്‍ക്ക് സഹായഹസ്തവുമായി മുന്നിട്ടിറങ്ങി. ആ പ്രളയകാലത്തും പല നന്മമരങ്ങളെ നാം കണ്ടു, ഇപ്പോഴിതാ അക്കൂട്ടത്തിലേക്ക് ഒരാള്‍ കൂടി. തനിക്കുള്ള 25 സെന്റ് സ്ഥലത്തില്‍ നിന്നും 20 സെന്റ് സ്ഥലം അഞ്ചു കുടുംബങ്ങള്‍ക്ക് വിട്ട് നല്‍കാനൊരുങ്ങിയിരിക്കുകയാണ് ജിജി. ജിജിയുടെ സഹപാഠി റൂബി സജ്നയാണ് ഇക്കാര്യം ഫെയ്സ്ബുക്കിലൂടെ പങ്കുവച്ചിരിക്കുന്നത്.
റൂബിയുടെ ഫെയ്സ്ബുക്ക് കുറിപ്പ് :
20 cent സ്ഥലം 5 പേർക്ക്..പ്രളയത്തിൽ സർവ്വതും നഷ്ട്ടപ്പെട്ട അഞ്ച് കുടുംബങ്ങൾക്കായി 20 cent സ്ഥലം മനസ്സറിഞ്ഞ് മാറ്റിവയ്ക്കുകയാണ് എന്റെ സഹപാഠിയായ ജിജി....
ഒരുപാടൊന്നുമുണ്ടായിട്ടല്ല.... ഒരുപാട് നൻമ നിറഞ്ഞ മനസ്സുള്ളത് കൊണ്ട് മാത്രം.....
ഇല്ലായ്മയുടെ കുടുംബാന്തരീക്ഷത്തിൽ നിന്നും ഇന്നിന്റെ ധന്യതയിലേക്ക് അവൾ വളർന്നത് ഒരു പാടു യാതനകളോടുള്ള പോരാട്ടത്തിലൂടെയായിരുന്നു.... മുഴുപ്പട്ടിണിയുടെ മൂർദ്ധാവിൽ നിൽക്കുമ്പോഴും അവളുടെ കണ്ണുകളിൽ കണ്ടിരുന്ന ആ പ്രതീക്ഷകളുടെ തിളക്കം ഇന്നവൾ പടവെട്ടി യാധാർത്ഥ്യമാക്കിയിരിക്കുകയാണ്... അതിൽ നിന്നും ഒരു പങ്ക് ദുരിതബാധിതർക്ക് നൽകാൻ അവൾ തീരുമാനിച്ചതിൽ ഒട്ടും അൽഭുതപ്പെടാനില്ല...
അതിനൊക്കെ ഒരു പാട് മുകളിലാണ് അവളുടെ ഹൃദയവിശാലത.... സ്വന്തമായി വാങ്ങിയ 25 സെന്റ് ഭൂമിയിൽ നിന്നും 5 സെന്റ് മാത്രം സ്വന്തം ഉപയോഗത്തിനെടുത്ത് ബാക്കിയുള്ള 20 സെൻറും ദുരിതബാധിതർക്ക് വീതിച്ചു നൽകുവാൻ തയ്യാറായിരിക്കുകയാണ് ജിജി....
ഈ തീരുമാനം കഴിഞ്ഞ ദിവസം എന്നെ വിളിച്ച് പറയുകയും ബഹുമാന്യനായ നിലമ്പൂർ MLA ശ്രീ PVഅൻവറിനോട് ഞാൻ ഈ വിവരം ചർച്ച ചെയ്യുകയുമുണ്ടായി....
അദ്ദേഹം ജിജിയുടെ വലിയ മനസ്സിനു നന്ദി പറഞ്ഞ് കൊണ്ട് ജിജിയുമായി ഇന്ന് സംസാരിച്ച് തുടർനടപടികളിലേക്ക് കടക്കും.....
ഒരുപാടു നന്മ മനസ്സുകൾ എന്റെ നിലമ്പൂരിലേയ്ക്ക് സഹായ ഹസ്തങ്ങളുമായി കടന്നു വരുന്നുണ്ട്.... ഓരോനാണയത്തുട്ടുകളും ഏറെ വിലപ്പെട്ടതുമാണ്.... എങ്കിലും പട്ടിണികൊണ്ട് പള്ളയൊട്ടിയ ജിജിയെന്ന എന്റെ ആ പഴയ പാവാടക്കാരിയുടെ ഹൃദയവിശാലതയോളം വിലമതിക്കുന്ന ഒന്നും എന്റെ നാടിനു ലഭിക്കില്ലെന്നു തന്നെ ഞാൻ കരുതുന്നു...
മുത്തേ... അഞ്ചു കുടുംബങ്ങളുടെ കൺകണ്ട ദൈവമായ നീ മാറുമ്പോൾ എനിക്കും തോന്നുന്നെടീ നിന്നോട് വല്ലാത്ത ഒരു ആരാധന....
