‘കുട്ടാ കുട്ടാ കരയല്ലേ കുട്ടാ.. കരയല്ലേ പിരിയല്ലേ കുട്ടാ..’ നില്ല് നില്ല് ചലഞ്ചിന് ശേഷം സോഷ്യൽ ലോകത്ത് ആസ്വാദനത്തിന്റെ പുതിയ തലം തീർക്കുകയാണ് ഇൗ ഗാനം. ഒട്ടേറെ പേരാണ് ഇൗ പാട്ടിനൊത്ത് ചുവട് വയ്ക്കുന്നത്. നാടൻപാട്ട് കലാകാരി പ്രസീത ചാലക്കുടിയും ടിക്ടോകിലൂടെ വൈറലായ ആർദ്ര സാജനും ഒരുമിച്ച് ചെയ്ത വിഡിയോയാണ് ടിക് ടോക് ചലഞ്ചായി ഇപ്പോൾ ഏറ്റെടുത്തിരിക്കുന്നത്.
യഥാർഥ പാട്ടിനെക്കാൾ വൈറലായ ടിക് ടോക് ഗാനത്തിനും ആരാധകരേറെയാണ്. മിമിക്രിയിലൂടെ ആർദ്രയാണ് ഇൗ ഗാനത്തിന് അനുയോജ്യമായ സംഗീതമൊരുക്കിയത്. ഹൃദ്യമായ മിമിക്രി സംഗീതവും നാടൻ പാട്ടും കൂടി ചേരുമ്പോൾ തുള്ളാത്ത മനവും തുള്ളും എന്നാണ് വിഡിയോയ്ക്ക് കിട്ടുന്ന രസികൻ കമന്റ്. ഇൗ താളത്തിനൊത്ത് ചുവട് വയ്ക്കുകയാണ് സോഷ്യൽ ലോകം. വിഡിയോ കാണാം.
