ഐപിഎല്‍ ആരാധകര്‍ക്ക് സീസണില്‍ ഏറ്റവും അധികം മിസ് ചെയ്തത് ക്രിസ് ഗെയിലിന്‍റെ വെടിക്കെട്ട് ബാറ്റിങും ഗ്രൗണ്ടിലെ വിജയാഘോഷവുമാകും എന്നതില്‍ തര്‍ക്കമില്ല. ഐപിഎല്ലിന്‍റെ ഇന്ന് വരെയുള്ള ചരിത്രത്തിലെ ഇതിഹാസമാണ് ക്രിസ് ഗെയില്‍. പക്ഷേ ആരാധകരെ ഞെട്ടിച്ച് ഈ സീസണില്‍ കളിക്കാനില്ലെന്ന് ഗെയില്‍ പ്രഖ്യാപിക്കുകയായിരുന്നു. താനര്‍ഹിച്ച ബഹുമാനം ലഭിക്കുന്നില്ലെന്ന് തോന്നിയതോടെയാണ് സീസണില്‍ കളിക്കുന്നില്ലെന്ന് തീരുമാനിച്ചതെന്ന് ഗെയില്‍ തുറന്ന് പറയുന്നു.
'കഴിഞ്ഞ രണ്ട് സീസണുകളിലെ ഐപിഎല്‍ വിലയിരുത്തിയപ്പോള്‍ എന്നോടുള്ള സമീപനം അത്ര നന്നായി തോന്നിയില്ല . അതുകൊണ്ട് ഒഴിഞ്ഞ് നില്‍ക്കാന്‍ തീരുമാനിക്കുകയായിരുന്നുവെന്നും ഗെയില്‍ 'യുകെ മിററി'ന് നല്‍കിയ അഭിമുഖത്തില്‍ വെളിപ്പെടുത്തി. ഐപിഎല്ലിൽ കൊൽക്കത്ത, പഞ്ചാബ്, റോയൽ ചലഞ്ചേഴ്സ് ടീമുകൾക്ക് വേണ്ടിയാണ് ഗെയില്‍ നേരത്തെ കളിച്ചത്. ടീമുകൾക്ക് ആവശ്യമുണ്ടെങ്കിൽ അടുത്ത സീസണിൽ കളിക്കുന്ന കാര്യം പരിഗണിക്കുമെന്നും' അദ്ദേഹം വ്യക്തമാക്കി.
