ക്രിക്കറ്റ് ബാറ്റും ബോളും ആണ്‍കുട്ടികളെ ഉദ്ദേശിച്ചുള്ളതാണെന്ന് ആരാണ് പറഞ്ഞത്? ചെറുപ്രായത്തിൽ തന്നെ നല്ല ഉശിരൻ ഷോട്ടുകൾ വീശുന്ന പെൺകുട്ടികളുമുണ്ടെന്ന് തെളിയിക്കുകയാണ് ഒഡീഷയിലെ ഈ നാലുവയസുകാരി. ക്രിക്കറ്റ് താരമാകുക എന്നതാണ് ഈ കൊച്ചുമിടുക്കിയുടെ സ്വപ്നം. അതിനുവേണ്ടി ഇപ്പോൾ തന്നെ പരിശീലനവും തുടങ്ങി. ബാറ്റിങ്ങ് കണ്ട് അമ്പരന്നിരിക്കുകയാണ് സോഷ്യൽ ലോകം.
ഒഡീഷയിലെ ബലസോര്‍ ജില്ലക്കാരിയാണ് സുധ്രുതി എന്ന ഈ പെൺകുട്ടി. മഹേന്ദ്ര സിങ് ധോണിയുടെ കടുത്ത ആരാധിക കൂടിയാണ് സുധ്രുതി. മഹി എന്നാണ് വീട്ടുകാരും ആരാധകരും ഇപ്പോൾ ഇവളെ വിളിക്കുന്നത്. നാല് വയസേ ഉള്ളൂവെങ്കിലും ക്രിക്കറ്റിങ് ഷോട്ടുകളുടെ കാര്യത്തില്‍ മുതിര്‍ന്നവരെ പോലും പിന്നിലാക്കു വിധമാണ് പ്രകടനം.
വീടിന്റെ ടെറസില്‍ പ്രാക്ടീസ് ചെയ്യുന്ന ഈ മിടുക്കിയുടെ വിഡിയോ വൈറലായിക്കഴിഞ്ഞു. ഇംഗ്ലണ്ട് താരം ഡാനിയേല വയറ്റ് അടക്കമുള്ള താരങ്ങള്‍ സുധ്രുതിയുടെ വിഡിയോ ഷെയർ ചെയ്തിട്ടുണ്ട്.
