കേരളത്തിലെ മികച്ച സ്പോർട്സ് ക്ലബിന് സാന്റാ മോണിക്ക ഹോളിഡേയ്‌സിന്റെ സഹകരണത്തോടെ മലയാള മനോരമ നൽകുന്ന പുരസ്കാരത്തിന്റെ ചുരുക്കപ്പട്ടികയിൽ ഇടം നേടിയത്തിന്റെ ആവേശത്തിലാണ് കോഴിക്കോട് കോട്ടൂർ പഞ്ചായത്തിലെ ബ്രദേഴ്സ് മൂലാട് ക്ലബ് .വോളിബോളിനൊപ്പം കബഡിയിലും അമ്പൈത്തിലും ബ്രദേഴ്സ് മൂലാടിലെ താരങ്ങൾ നേട്ടങ്ങൾ സ്വന്തമാക്കി .
വോളിയെ ജീവനുതുല്യം സ്നേഹിക്കുന്നവരുടെ നാട്ടിൽ വോളിബോൾ പ്രേമത്തിന്റെ പര്യായമാണു ബ്രദേഴ്സ് മൂലാട്. ടീം രൂപീകരിച്ച 1983 മുതൽ സഹോദരങ്ങളാണു കളത്തിലിറങ്ങുന്നവരിലേറെയും. അങ്ങനെ മൂലാട് ബ്രദേർസ് എന്ന പേരുവന്നു . ഇപ്പോഴത്തെ കോർട്ടിൽനിന്നു നോക്കിയാൽ ദേശീയതാരം സി.കെ.രതീഷിന്റെ വീട് കാണാം. പ്രൊ വോളി ലീഗിൽ കാലിക്കറ്റ് ഹീറോസിന്റെ താരമാണു രതീഷ്.
രാവിലെയും വൈകിട്ടും ഇപ്പോൾ കോർട്ട് സജീവം. 15 താരങ്ങൾ ഇതിനോടകം മൂലാട് ബ്രദേഴ്സിൽനിന്നു ദേശിയ ടീമിലെത്തി . ഇത്തവണ വനിതകൾ ദേശീയ കിരീടമുയർത്തിയപ്പോൾ എസ്.രേഖയിലൂടെ മൂലാട് കേരള ടീമിൽ ഇടംപിടിച്ചു. ലോക മിലിട്ടറി ഗെയിംസിൽ വെങ്കലം നേടിയ ഇന്ത്യൻ വോളി ടീമിലെ അംഗമായിരുന്നു മൂലാട് ബ്രദേഴ്സിന്റെ മുൻതാരം പി.പി.ശരത്.
