ഫുട്ബോൾ കളി മാത്രമല്ല, വികാരം കൂടിയാണ്. ഇവിടെ കേരളത്തിൽ ദിനു മുതൽ അവിടെ റഷ്യയിൽ മറഡോണ വരെ ആ വികാര വേലിയേറ്റത്തിൻറ പല തലങ്ങളിലൂടെ കടന്നുപോയവരാണ്. ഒരു നിമിഷത്തിൻറെ തോന്നലിൽ ദിനു ജീവനൊടുക്കിയപ്പോൾ ആവേശം പരകോടിയിലെത്തി മറഡോണ കുഴഞ്ഞുവീണു.
അധികമൊന്നുമില്ല, ആവേശം ഒരൽപം കൂടിപ്പോടി, നെയ്മറിൻറെ സഹോദരി റാഫേല്ല സാൻറോസിനും. കോസ്റ്ററിക്കയെ തോൽപിച്ച് മഞ്ഞപ്പട ജയിച്ചു കയറിയപ്പോൾ റാഫെല്ലയുടെ കയ്യൊടിഞ്ഞു. എന്നാൽ ആ വേദനക്കും ഒരു മധുരമുണ്ട്. എല്ലാം രാജ്യത്തിനു വേണ്ടിയാണല്ലോ, സഹോദരനു വേണ്ടിയാണല്ലോ എന്നോർക്കുമ്പോഴാണ് ആശ്വാസം.
വെള്ളിയാഴ്ച നടന്ന ബ്രസീൽ-കോസ്റ്ററിക്ക മത്സരത്തിനിടെയായിരുന്നു സംഭവം. നെയ്മർ ഗോളടിച്ചപ്പോൾ ആവേശം അടക്കാനായില്ല സഹോദരിക്ക്. ആഹ്ലാദപ്രകടനത്തിനിടെ ഒപ്പുമുണ്ടായിരുന്ന സുഹൃത്തുമായി റാഫെല്ലയുടെ കൈ കൂട്ടിയിച്ചു. കൈയില്‍ പ്ലാസ്റ്ററുമിട്ട് നിൽക്കുന്ന ചിത്രം റാഫെല്ല തന്നെ ഇൻസ്റ്റഗ്രാമിൽ പങ്കുവെച്ചിരുന്നു.
