മലബാറില്‍ ശക്തമായ മഴ തുടരുന്നു. കണ്ണൂരില്‍ താഴ്ന്ന പ്രദേശങ്ങളിലെല്ലാം വെള്ളം കയറി. ബുധനാഴ്ച വരെ സംസ്ഥാനത്ത് ശക്തമായ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രം അറിയിച്ചിരിക്കുന്നത്.
കഴിഞ്ഞ ദിവസം കണ്ണൂരിലെ തളാപ്പില്‍ യുവാവിന്റെ ബിഎംഡബ്ല്യൂ കാര്‍ വെള്ളക്കെട്ടില്‍ കുടുങ്ങി. വെള്ളം നിറഞ്ഞതിനാല്‍ റോഡ് കാണാന്‍ സാധിച്ചിരുന്നില്ല. റോഡിലെ കുഴിയില്‍ വാഹനം പെട്ടു. ബെംഗളുരുവില്‍ നിന്ന് കണ്ണൂരിലെ സുഹൃത്തിന്റെ വീട്ടിലെത്തിയ യുവാവിന്റെ കാറാണ് വെള്ളക്കെട്ടില്‍ കുടുങ്ങിയത്.
വാഹനം മുന്നോട്ടെടുക്കാന്‍ ശ്രമിച്ചെങ്കിലും സാധിച്ചില്ല. മഴ ശക്തമായതോടെ റോഡില്‍ വീണ്ടും വെള്ളം നിറഞ്ഞു. അപ്പോഴേക്കും വാഹനത്തിന് അകത്തും വെള്ളം കയറി. തുടര്‍ന്ന് നാട്ടുകാര്‍ സഹായത്തിനെത്തി. ക്രെയിനിന്റെ സഹായത്തോടെ വണ്ടി വെള്ളക്കെട്ടില്‍ നിന്നുയര്‍ത്തുകയായിരുന്നു.
