റമസാനിലെ പരിശുദ്ധമായ ഇരുപത്തേഴാം രാവിൻറെ നിറവിൽ വിശ്വാസികൾ. പ്രത്യേക പ്രാർഥനകളോടെയാണ് വിശ്വാസികൾ പുണ്യം നിറഞ്ഞ രാവിൻറെ ഭാഗമാകുന്നത്. മക്കയിലും മദീനയിലും തീർഥാടകർ ഉറങ്ങാതെ പ്രാർഥനയിൽ മുഴുകുകയാണ്.
വിശുദ്ധ ഖുർആൻ അവതരിപ്പിക്കപ്പെട്ട, ആയിരം മാസങ്ങളേക്കാൾ പുണ്യം നിറഞ്ഞ രാവിൽ പ്രാർഥനകളോടെ അല്ലാഹുവിനൊപ്പമായിരിക്കുകയാണ് വിശ്വാസികൾ. പാപമോചനവും നരകമോചനവും തേടി ഈ രാവിൽ ഉറങ്ങാതെയാണ് വിശ്വാസികൾ പ്രാർഥനാനിരതയാരിയിരിക്കുന്നത്. പ്രവാസി മലയാളികളടക്കമുള്ളവർ ഗൾഫിലെ വിവിധ പള്ളികളിലായി പ്രാർഥനയിലാണ്. മക്കയിലും മദീനയിലും തീർഥാടക ലക്ഷങ്ങൾ പ്രാർഥനാനിരതരായി പുണ്യം തേടുന്നു.
ഇഫ്താറും സുഹൂറും കഴിഞ്ഞ വിശ്വാസികൾ പുലരുംവരെ പ്രാർഥനയിൽ മുഴുകും. പന്ത്രണ്ടായിരത്തിലധികം പേരാണ് തീർഥാടകർക്കു സേവനം നൽകാൻ മക്കയിലും മദീനയിലുമായി അണിനിരന്നിരിക്കുന്നത്. ഇരുപത്തേഴാം രാവിലെ തിരക്കു പ്രമാണിച്ച് കനത്ത സുരക്ഷയാണ് ഇരു നഗരങ്ങളിലും ഒരുക്കിയിരിക്കുന്നത്.
