നെറ്റ്ഫ്ലിക്സിൽ ഏറ്റവും വലിയ ഹിറ്റായി മമ്മൂട്ടി ചിത്രം സിബിഐ 5; ദ ബ്രെയിന്‍. തിയേറ്ററിലെ പ്രദര്‍ശനത്തിന് ശേഷമാണ് ചിത്രം നെറ്റ്ഫ്ലിക്‌സില്‍ റിലീസ് ചെയ്തത്. ജൂണ്‍ 13 മുതല്‍ 19 വരെയുള്ള കണക്കെടുത്താല്‍ ലോക സിനിമകളില്‍ നാലാമതാണ് സിബിഐ 5ന്റെ സ്ഥാനം. റിലീസ് ചെയ്ത് തുടര്‍ച്ചയായി രണ്ടാമത്തെ ആഴ്ചയും സിബിഐ 5 നാലാം സ്ഥാനത്ത് തന്നെ തുടര്‍ന്നു. സിബിഐ 5 വലിയ തോതിൽ ട്രോളിനിരയായിക്കൊണ്ടിരിക്കുമ്പോഴാണ് ഈ നോട്ടത്തിന്റെ വാർത്തയെത്തുന്നത് എന്നതാണ് ശ്രദ്ധേയം.
റിലീസ് ചെയ്ത് 8 ദിവസത്തിനുള്ളില്‍ 28.8 ലക്ഷം ആളുകളാണ് ചിത്രം കണ്ടത്. ഗള്‍ഫ് രാജ്യങ്ങളിലും പാകിസ്ഥാന്‍, മാലിദ്വീപ്, മലേഷ്യ, സിംഗപ്പൂര്‍, ശ്രീലങ്ക എന്നിവിടങ്ങളിലെല്ലാം സിബിഐ 5 ട്രെന്‍ഡിങ്ങിലെത്തി. സിബിഐ 5ന് മുൻപിൽ ദാ റോത്ത് ഓഫ് ഗോഡ്, സെന്‍തൗറോ, ഹേര്‍ട്ട് പരേഡ് എന്നീ ചിത്രങ്ങളാണുള്ളത്. ഭൂല്‍ഭുലയ്യ 2വും ഈ ലിസ്റ്റിലുണ്ട്.
എസ്.എന്‍ സ്വാമിയുടെ തിരക്കഥയിൽ കെ. മധുവാണ് സിബിഐ 5 സംവിധാനം ചെയ്തത്. രഞ്ജി പണിക്കര്‍, സൗബിന്‍ ഷാഹിര്‍, ആശ ശരത്, അനൂപ് മേനോന്‍, ദിലീഷ് പോത്തന്‍, സായ്കുമാര്‍, ജയകൃഷ്ണന്‍, മുകേഷ്, കനിഹ, പ്രതാപ് പോത്തന്‍, രമേഷ് പിഷാരടി തുടങ്ങി വൻതാരനിര തന്നെ ചിത്രത്തിലെത്തിയിരുന്നു. ചിത്രത്തില്‍ ജഗതി ശ്രീകുമാര്‍ അതിഥിവേഷത്തിലെത്തിയിരുന്നു.
