മഴവിൽ മനോരമ എന്റർടെയ്ൻമെന്റ് അവാർഡ് നിശയിൽ അവതാരകന്റെ വേഷത്തിലായിരുന്നു കുഞ്ചാക്കോ ബോബൻ. യേശുദാസ് വേദിയിലെത്തിയപ്പോൾ രസകരമായ മറ്റൊരു നിമിഷത്തിന്റെ കൂടി പിറവിയായിരുന്നു. അച്ഛനായതിന്റെ അഭിനന്ദനം വേദിയിൽ വച്ച് അറിയിച്ച യേശുദാസ് കുഞ്ചാക്കോ ബോബനോട് ചോദിച്ചു. കുഞ്ഞിന് പേരിട്ടോ?. ആരാധകർ കാത്തിരുന്ന ആ മറുപടി വേഗത്തിലെത്തി. തന്റെ പേര് തിരിച്ചിട്ടാൽ മതിയെന്നായിരുന്നു കുഞ്ചാക്കോ ബോബന്റെ മറുപടി. ആരാധകർ പ്രവചിച്ച പേര് തന്നെയാണ് അദ്ദേഹം കുട്ടിക്ക് നൽകിയത് ബോബൻ കുഞ്ചാക്കോ.
കുഞ്ചാക്കോ ബോബന്റെ അപ്പച്ചന്റെ പേരും ബോബൻ കുഞ്ചാക്കോ എന്നായിരുന്നു. ആ പേര് തിരിച്ചു ഇട്ടാണ് അദ്ദേഹം തന്റെ മകന് കുഞ്ചാക്കോ ബോബൻ എന്ന് പേരിട്ടത്. ഇപ്പോൾ അതേ ചരിത്രം കുഞ്ചാക്കോ ബോബനും തന്റെ മകന് വേണ്ടി ആവർത്തിച്ചിരിക്കുകയാണ്. ‘ഇൗ കുഞ്ഞ് വലുതായി സിനിമയിൽ അഭിനയിക്കുമ്പോഴും പാടാൻ ദാസേട്ടനുണ്ടാവും. ഒപ്പം കട്ടയ്ക്ക് മൽസരിച്ചഭിനയിക്കാൻ മമ്മൂക്കയും’- ചിരിയുടെ വെടിക്കെട്ട് തീർത്തായിരുന്നു അവാർഡ് നിശയിൽ സമീപത്തുണ്ടായിരുന്ന രമേശ് പിഷാരടിയുടെ കമന്റ്.
