സമ്പദ്ഘടനയെ മാന്ദ്യത്തില്‍നിന്ന് കരകയറ്റുന്നതിന്റെ ഭാഗമായി കേന്ദ്രബജറ്റില്‍ വലിയ ആദായനികുതി ഇളവുകള്‍ ഉണ്ടാകുമെന്നാണ് ധനകാര്യവിദഗ്ധരുടെ വിലയിരുത്തല്‍. അഞ്ചുലക്ഷംരൂപവരെ പ്രതിശീര്‍ഷ വരുമാനമുള്ളവരെ നികുതിയില്‍നിന്ന് ഒഴിവാക്കിയേക്കുമെന്ന ശുഭപ്രതീക്ഷയ്ക്കൊപ്പം കോര്‍പറേറ്റ് മേഖലയ്ക്കും നികുതിയിളവ് ഉണ്ടായേക്കുമെന്നാണ് പ്രതീക്ഷ.
ഗണ്യമായ നികുതിയിളവ് നല്‍കി സമ്പത്ത്ഘടനയിലേക്ക് കൂടുതല്‍പണമെത്തിച്ചാല്‍ മാത്രമെ പ്രകടമായ സാമ്പത്തികമാന്ദ്യത്തില്‍നിന്ന് കരകയറാനാകൂ. ഈ അടിസ്ഥാനപ്രമാണം ചൂണ്ടിക്കാട്ടിയാണ് വലിയ ആദായനികുതി ഇളവുകളുടെ സാധ്യത പ്രവചിക്കുന്നത്. ഭവനവായ്പ പലിശനിരക്കിലും ഇളവ് പ്രതീക്ഷിക്കാം.
ഇതിന് പുറമെ നാന്നൂറ് കോടിരൂപവരെ വിറ്റുവരവുള്ള കോര്‍പറേറ്റ് കമ്പനികള്‍ക്ക് നിലവിലുള്ളനികുതി ഇരുപത്തിയഞ്ച് ശതമാനമാണ്. ഇത് ഇരുപത്തിരണ്ടോ ഇരുപത് ശതമാനമോ ആയി കുറയ്ക്കണമെന്നതും പരിഗണിക്കാനിടയുണ്ട്. എന്നാല്‍ പ്രത്യക്ഷനികുതി വരുമാനത്തിലെ കുറവ് നികത്തേണ്ടതിനാല്‍ അതിനായുള്ള തന്ത്രപരമായ സമീപനവും ബജറ്റിലുണ്ടാകും.
