ഒമാനിൽ തൊഴിൽ പ്രശ്നങ്ങൾ പരിഹരിക്കുന്നതിനായി പ്രത്യേക കോടതി സ്ഥാപിക്കുന്നു. കോടതിയെ സഹായിക്കുന്നതിന് സാങ്കേതിക വിദഗ്ദർ അടങ്ങിയ സമിതിക്ക് രൂപം നൽകി. തൊഴിൽ കേസുകൾ കാലതാമസം കൂടാതെ തീർപ്പാക്കുന്നതിനുള്ള നടപടികളുടെ ഭാഗമായാണ് ഇതിനായി പ്രത്യേക കോടതി സ്ഥാപിക്കുന്നത്. പലപ്പോഴും തൊഴിൽ പ്രശ്നങ്ങൾ തീർപ്പാക്കുന്നതിന് മാസങ്ങൾ വേണ്ടി വരുന്നു. എന്നാൽ പുതിയ നിയമസംവിധാനം വരുന്നതോടെ ഈ താമസം ഇല്ലാതാകും. രാജ്യത്തെ നിയമം അനുസരിച്ച് തൊഴിലാളിക്കെതിരെ നടപടിയെടുക്കും മുമ്പ്അതിന് ആധാരമായ തെളിവുകൾ ഹാജരാക്കേണ്ടതുണ്ട്.
എന്തുകൊണ്ട് ജോലിയിൽ തുടരാൻ അനുവദിക്കാൻ കഴിയില്ല എന്ന കാര്യം സാധൂകരിക്കുന്നതാകണം ഈ തെളിവുകൾ. സ്വദേശിയെയാണ് ജോലിയിൽനിന്ന് ഒഴിവാക്കുന്നതെങ്കിൽ പകരം വിദേശിയെ നിയമിക്കരുത്. ജോലിയിൽനിന്ന് ആദ്യത്തെയാളെ ഒഴിവാക്കുന്നതിനുമുൻപേ,പകരക്കാരനെ നിയമിക്കുകയും വേണം.സ്വദേശിയെ നിയമിച്ചാൽ കുറഞ്ഞത് രണ്ടുവർഷം അയാളെ ജോലിയിൽ തുടരാൻ അനുവദിക്കണമെന്ന രീതിയിൽ ഈ നിയമത്തിൽ പരിഷ്കരണം വരുത്തിയിട്ടുണ്ട്.രണ്ടുവർഷത്തിന് ശേഷം ജോലിയിൽ തുടരണമോ വേണ്ടയോ എന്നത് തൊഴിലുടമയുടെയും തൊഴിലാളിയുടെയും വിശേഷാധികാരത്തിൽപെട്ട കാര്യമാണെന്നും അധികൃതർ അറിയിച്ചു