ഒരു മികച്ച ഫീൽ ഗുഡ് മോട്ടിവേഷനൽ സിനിമയാണ് എബി. പറക്കാൻ വേണ്ടി ജീവിക്കുന്ന ഒരു ചെറുപ്പക്കാരന്റെ ജീവിതത്തിന്റെ കഥ പറയുന്ന ചിത്രം പ്രേക്ഷകന്റെ കണ്ണു നനച്ചും ഉള്ളു നിറച്ചും മുന്നോട്ടു പോകുന്ന ഒന്നാണ്.
ഹൈറേഞ്ചിലെ ഒരു ഗ്രാമത്തിൽ ജനിച്ചു വളർന്നയാളാണ് എബി. പറക്കുക എന്നതായിരുന്നു അവന്റെ സ്വപ്നം. ശാരീരികവും മാനസികവുമായ പരിമിതികൾ ഉണ്ടായിരുന്നെങ്കിലും ആകാശത്തോളം പോന്ന ആ സ്വപ്നമായിരുന്നു അവനെ ജീവിക്കാൻ പ്രേരിപ്പിച്ചത്. വീട്ടിലെയും നാട്ടിലെയും സാഹചര്യങ്ങൾ എബിക്ക് ഒട്ടും അനുകൂലമായിരുന്നില്ല. വെല്ലുവിളികളെ അതിജീവിച്ച് തന്റെ സ്വപ്നസാക്ഷാത്ക്കാരത്തിലേക്ക് എബി പറന്നടുക്കുന്നതാണ് ചിത്രത്തിന്റെ പ്രമേയം.
ഫ്ലാഷ്ബാക്കിൽ നിന്നാണ് ചിത്രം ആരംഭിക്കുന്നത്. കുഞ്ഞ് എബിയുടെയും അമ്മയുടെയും കണ്ണിലൂടെ സിനിമ യാത്ര ആരംഭിക്കും. ആദ്യ 15 മിനിറ്റിൽ തന്നെ കാഴ്ചക്കാരന്റെ കണ്ണു നനയിക്കുന്ന എബി പിന്നീട് ചിരിയിലൂടെയും ചിന്തയിലൂടെയുമാണ് മുന്നോട്ടു പോകുന്നത്. ബോറടിപ്പിക്കാതെ അവസാനിക്കുന്ന ആദ്യ പകുതിയിൽ നിന്ന് കുറച്ചു കൂടി വലിയ ക്യാൻവാസിലുള്ള രണ്ടാം പകുതിയിലേക്ക് സിനിമ സഞ്ചരിക്കും. രണ്ടാം പകുതിയിൽ അവിടിവിടെ ചില കല്ലുകടികൾ (കണ്ടില്ലെന്നു നടിക്കാവുന്നവ) അനുഭവപ്പെടുമെങ്കിലും ക്ലൈമാക്സ് ആ പോരായ്മകളെ നികത്തുന്നതാണ്.
