നടിയെ ആക്രമിച്ച കേസില് അറസ്റ്റുണ്ടാകുമെന്ന് സൂചിപ്പിച്ച് ഡി.ജി.പി ലോക്നാഥ് ബെഹ്റ. കസ്റ്റഡിയിലെടുക്കലും അറസ്റ്റും അന്വേഷണത്തിന്റെ ഭാഗമാണെന്ന് അദ്ദേഹം മനോരമ ന്യൂസിനോട് പറഞ്ഞു. അന്വേഷണം ശരിയായ ദിശയിലാണെന്നും ലോക്നാഥ് ബഹ്റ വ്യക്തമാക്കി.
കൊച്ചിയിൽ നടിയെ ആക്രമിച്ച കേസിന്റെ അന്വേഷണത്തിൽ നിർണായക വഴിത്തിരിവുണ്ടാകുമെന്ന് സൂചന നൽകിയാണ് ഡിജിപി ലോക്നാഥ് ബഹ്റ അന്വേഷണ പുരോഗതി സംബന്ധിച്ച വിവരങ്ങൾ വെളിപ്പെടുത്തിയത്.
ഗൂഢാലോചന നടന്നോയെന്ന് ഇപ്പോൾ പറയാനാകില്ല. കൃത്യമായ ഏകോപനത്തോടെയാണ് അന്വേഷണം പുരോഗമിക്കുന്നതെന്നും ഡിജിപി. അന്വേഷണ ഉദ്യോഗസ്ഥർക്കിടയിൽ ഏകോപനമില്ലെന്ന മുൻ ഡിജിപി ടി പി സെൻകുമാറിന്റെ അഭിപ്രായം അദേഹത്തിന്റെ നിലപാട് മാത്രമാണെന്നും ലോക്നാഥ് ബഹ്റ പറഞ്ഞു. കേസിൽ ഇൗ ആഴ്ചതന്നെ പൊലീസ് നടപടി ഉണ്ടാകണമെന്ന് ഡിജിപി നിർദേശം നൽകിയതായാണ് വിവരം.