കോഴിക്കോട് ∙ നാലു വർഷം മുൻപ് ഭാര്യ വാഹനമിടിച്ചു മരിച്ച അതേസ്ഥലത്തുണ്ടായ അപകടത്തിൽ ഭർത്താവും മരിച്ചു. കണ്ണൂർ റോഡിൽ കനകാലയ ബാങ്കിനു സമീപം ‘സീ ഷെൽസി’ൽ സാമുവൽ കെ. ജോൺ (ഗ്ലെന്നി – 74) ആണ് കഴിഞ്ഞ മൂന്നിനുണ്ടായ അപകടത്തിൽ പരുക്കേറ്റ് ചികിത്സയിലിരിക്കെ ഇന്നലെ മരിച്ചത്.
മൂന്നിനു രാത്രി ഒൻപതോടെ കനകാലയ ബാങ്കിനു സമീപം സീബ്രാ വരയിലൂടെ റോഡ് മുറിച്ചു കടക്കവെ സാമുവലിനെ സ്കൂട്ടർ ഇടിക്കുകയായിരുന്നു. സംസ്കാരം ഇന്നു രാവിലെ ഒൻപതിനു വെസ്റ്റ്ഹിൽ സിഎസ്ഐ കത്തീഡ്രലിൽ. നാലു വർഷം മുൻപ് ഇതേ സ്ഥലത്തു സീബ്രാ വരിയിലൂടെ റോഡ് മുറിച്ചു കടക്കവെയാണ് സാമുവൽ കെ. ജോണിന്റെ ഭാര്യ എസ്മി സാമുവലിനെ വാഹനമിടിച്ചത്. ചികിത്സയിലായിരുന്ന അവർ മൂന്നാം ദിവസം മരിച്ചു. പാലക്കാട് സിഎസ്ഐ സ്റ്റുഡന്റ്സ് ഹോം വാർഡനായിരുന്നു. മകൻ: അശോക് സാമുവൽ (അസിസ്റ്റന്റ് സെക്ഷൻ ഓഫിസർ, കാലിക്കറ്റ് സർവകലാശാല). മരുമകൾ: കെ.ജി. എലിസബത്ത് സോണിയ. സഹോദരങ്ങൾ: ഗേളി, ഗ്ലാഡി.