തൃശൂർ ജില്ലയിലെ വെളളാംകല്ലൂരുളള ഡെൽവിൻ ആന്റണിയുടെയും ജെസിയുടെയും വീട് കേരളത്തിന്റെ കാലാവസ്ഥയ്ക്ക് അനുസരിച്ച് ചിട്ടപ്പെടുത്തിയ ഒന്നാണ്. കാറ്റും വെളിച്ചവും നിറയുന്ന അകത്തളങ്ങളോടെ കൂടിയതാണ് മനോഹരമായ ഈ വീട്. റോഡ് ലെവലിൽ നിന്ന് മൂന്ന് അടി താഴെയാണ് ഈ പ്ലോട്ട്. നിർമാണത്തിന് ഏറെ പരിമിതികൾ ഉളള പ്ലോട്ടാണിത്.
ചെങ്കൽ വെട്ടിയെടുത്ത വലിയ ഒരു കുഴിയിൽ മണ്ണിട്ടു നികത്തിയാണ് ഈ വീട് നിർമിച്ചിരിക്കുന്നത്. പതിനൊന്നു സെന്റിൽ 2350 സ്ക്വയർ ഫീറ്റിലാണ് ഈ വീട് നിർമിച്ചിരിക്കുന്നത്. തികച്ചും സമകാലിക ശൈലിയിലുളളതാണ് എലിവേഷൻ. കേരളത്തിന്റെ കാലാവസ്ഥയെ പരിഗണിച്ചു കൊണ്ടുളളതാണ് ഈ വീടിന്റെ രൂപകൽപ്പന. ഭിത്തിക്കും ജനാലകൾക്കും കൃത്യമായ ഷെയിഡിങ് ഡിവൈസ് നൽകി സംരക്ഷണം ഉറപ്പു വരുത്തിയിട്ടുണ്ട്. ഓഫ്വൈറ്റിലാണ് എലിവേഷൻ.