കോഹിനൂർ രത്നം തിരികെ ചോദിക്ക്; രാജ്ഞിക്കൊപ്പം കോഹ്‌ലി; ട്രോളി ആരാധകർ

ക്രിക്കറ്റ് ലോകകപ്പിന് മുന്‍പ് എലിസബത്ത് രാജ്ഞിയെ കണ്ട് ഇന്ത്യൻ നായകൻ വിരാട് കോഹ്‌ലി. മറ്റ് ടീം ക്യാപ്റ്റൻമാർക്കൊപ്പമാണ് കോഹ്‍ലി ബെക്കിങ്‌ഹാം കൊട്ടാരത്തിലെത്തി രാജ്ഞിയെ കണ്ടത്. ക്യാപ്റ്റൻമാരുമൊത്തുള്ള ചിത്രങ്ങൾ രാജകുടുംബം സോഷ്യൽ മീഡിയയില്‍ പങ്കുവെച്ചിരുന്നു. ചിത്രങ്ങൾക്ക് പോസിറ്റീവ് കമന്റുകളുമായി ആരാധകരെത്തിയെങ്കിലും കോഹ്‍ലിക്ക് കിട്ടിയതിലധികവും ട്രോളുകളായിരുന്നു. 

 

ബിസിസിഐ പങ്കുവെച്ച ട്വീറ്റിന് താഴെയായിരുന്നു കോഹ്‌ലിക്കുള്ള കമന്റുകൾ. ഇന്ത്യയിൽ നിന്ന് കൊണ്ടുപോയ കോഹിനൂർ രത്നം തിരികെ ചോദിക്കണമെന്നാണ് ചില രസികൻ ട്രോളുകൾ. 

 

ബ്രിട്ടീഷ് അധിനിവേശ കാലത്ത് ഇന്ത്യയിൽ നിന്ന് വെള്ളക്കാർ കടത്തിക്കൊണ്ടുപോയതാണ് കോഹിനൂർ രത്നം. നിലവില്‍ രാജ്ഞിയുടെ കിരീടത്തിലെ മറ്റ് രത്നങ്ങൾക്കൊപ്പമാണ് കോഹിനൂർ രത്നമുള്ളത്. 

 

നായകനായ ശേഷമുള്ള കോഹ്‍ലിയുടെ ആദ്യ ലോകകപ്പാണിത്. 1983, 2011 വര്‍ഷങ്ങളിലാണ് മുൻപ് ഇന്ത്യ ലോകകപ്പ് കിരീടം സ്വന്തമാക്കിയിട്ടുള്ളത്.