മുട്ട ഉള്ളിൽ കുടുങ്ങി അവശനിലയിലായ കോഴിക്കു ‘സിസേറിയൻ’. കൊല്ലം ജില്ലാ വെറ്ററിനറി കേന്ദ്രത്തിലാണു കോഴികളിൽ അപൂ‍ർവമായി നടത്തുന്ന ഈ ശസ്ത്രക്രിയ നടത്തിയത്. മുട്ടയിടാൻ കഴിയാതെ വന്നതോടെയാണ് ഉടമ കോഴിയുമായി ജില്ലാ വെറ്ററിനറി കേന്ദ്രത്തിലെത്തിയത്. തുടർന്നു നടത്തിയ എക്സ്റേ പരിശോധനയിൽ ഉള്ളിൽ 2 മുട്ടകൾ കുടുങ്ങിയതായി കണ്ടെത്തി. തുടർന്ന് അനസ്തീസിയ നൽകി സ്വാഭാവിക രീതിയിൽ ഒരു മുട്ട പുറത്തെടുത്തു.
എന്നാൽ കോഴിയുടെ രണ്ടാമത്തെ മുട്ട എടുക്കാൻ സാധിച്ചില്ല. അതു പുറത്തെടുക്കാനാണു ശസ്ത്രക്രിയ നടത്തിയത്. എഗ് ബൗണ്ട് കണ്ടിഷൻ എന്ന അവസ്ഥ സ്വാഭാവികമാണെങ്കിലും 2 മുട്ടകൾ ഉള്ളിൽ കുടുങ്ങുന്നത് അപൂർവമാണെന്നു സീനിയർ വെറ്ററിനറി സർജൻ ഡോ.ബി.അജിത് ബാബു പറഞ്ഞു. വെറ്ററിനറി കേന്ദ്രത്തിലെ ഡോ.നിജിൻ ജോസ്, ഡോ.രേവതി, ജൂനിയർ ഡോക്ടർമാരായ അജയ് പി.കുര്യാക്കോസ്, അനീസ് ഇബ്രാഹിം എന്നിവർ ശസ്ത്രക്രിയയ്ക്കു നേതൃത്വം നൽകി.
