ബാല്യത്തിൽ മണ്ണപ്പം ചുട്ടുകളിക്കാത്ത കുട്ടികൾ കുറവാണ്. കാലം മാറിയതോടെ മണ്ണപ്പം രൂപാന്തരം പ്രാപിച്ച് കേക്കായി മാറി. കൊച്ചുമിടുക്കിയുടെ മണ്ണ്കൊണ്ടുള്ള കേക്ക് ബേക്കിങ്ങാണ് ഇപ്പോൾ വൈറൽ. മണ്ണും ഇലകളും കൊണ്ടാണ് ഈ കുരുന്നിന്റെ കേക്ക് ഉണ്ടാക്കൽ. മണ്ണിൽ ചടഞ്ഞങ്ങനെയിരുന്നു മണ്ണു കുഴച്ചുള്ള ഈ കുക്കറി ഷോ ഒന്നു കാണേണ്ടതു തന്നെയാണ്.
ആവശ്യത്തിന് മണ്ണും ഇലയും കുഴച്ച് കേക്ക് ട്രേയിൽ വച്ച് ഉണ്ടാക്കിയ കേക്ക് അല്പം പൊടിഞ്ഞെങ്കിലും യാതൊരു ഭാവഭേദവിമില്ലാതെ വിവരണം തുടരുകയാണ്. ഹാപ്പി ബർത്ത് ഡേ പാട്ടും പാടിയാണ് ഈ മിടുക്കി താൻ ഉണ്ടാക്കിയ കേക്ക് മുറിക്കുന്നത്.
അവസാനത്തെ പഞ്ച് ഡയലോഗാണ് വിഡിയോയുടെ ഹൈലൈറ്റ്. വിഡിയോ 'ഇസ്തപ്പെട്ടാൽ ഷെയറ് ചെയ്യണ്ട, ഇസ്തപ്പെട്ടില്ലേല്‍ ഷെയറ് ചെയ്യണ്ട' എന്ന് വളരെ ആത്മാർഥതയോടെയുള്ള കുഞ്ഞാവയുടെ പറച്ചിൽ ആരിലും ചിരിയുണർത്തും.
