ടൂറിസ്റ്റ് ബസുകളുടെ നിയമലംഘന പട്ടികയിലേക്ക് പുതിയൊരാൾ കൂടി. ബസ് ഒാടിക്കുമ്പോൾ രണ്ട് കൈയ്യും വിട്ട് ഡാൻസ് കളിക്കുകയാണ് ഇവിടെ ഡ്രൈവർ. പാട്ടിൽ മുഴുകിയിരിക്കുന്ന ഡ്രൈവറുടെ ശ്രദ്ധ സ്റ്റിയറിങ്ങിലല്ല.
അപകടകരമായ രീതിയിൽ വാഹനമോടിക്കുന്ന ഇയാൾ തുലാസിലാക്കുന്നത് സ്വന്തം ജീവൻ മാത്രമല്ല വാഹനത്തിലെ മറ്റു യാത്രക്കാരുടേയും ജീവനാണ്. സംഭവം നടന്ന സ്ഥലമോ വാഹനമോടിച്ച ആളുടെ വിവരങ്ങളോ ലഭ്യമല്ല.
നേരത്തെ ഇത്തരത്തിൽ അപകടകരമായ രീതിയിൽ വാഹനമോടിക്കുന്ന വിഡിയോകൾ വൈറലായതിനെ തുടർന്ന് നിരവധി ഡ്രൈവർമാർക്കെതിരെ മോട്ടർ വാഹന വകുപ്പ് നടപടിയെടുത്തിരുന്നു. എന്നിട്ടും നിയമലംഘനങ്ങൾ തുടർക്കഥയാകുന്നു എന്നതിന്റെ സൂചനയാണ് ഈ വിഡിയോ.
ബസിൽ യാത്ര ചെയ്യുന്ന പെൺകുട്ടികളെകൊണ്ട് ഗിയർമാറ്റിക്കുന്ന ഡ്രൈവറിനും പാട്ടുകാരൻ ഡ്രൈവറിനും ബസിൽ അഭ്യാസം കാണിക്കുന്ന ഡ്രൈവറിനും ശേഷമാണ് ഡാൻസ് കളിക്കുന്ന ഡ്രൈവറുടെ പ്രകടനം.
