ഇഡലി പാത്രത്തിന്റെ അടപ്പിൽ വിരൽ കടത്തിയുള്ള ബാലികയുടെ കളി ഒടുവിൽ കാര്യമായി. മണിക്കൂറുകൾക്കു ശേഷം വിരലിന് ഒരു പോറൽ പോലും ഏൽക്കാതെ അഗ്നിരക്ഷാസേനാംഗങ്ങൾ അടപ്പ് മുറിച്ചു മാറ്റി.
ഇന്നലെ രാവിലെയാണ് മരുത്തടി ചാത്തോലിൽ കിഴക്കതിൽ അനീഷിന്റെ മൂന്നര വയസ്സുള്ള മകളുടെ ചൂണ്ടു വിരൽ ഇഡലി പാത്രത്തിന്റെ അടപ്പിൽ കുടുങ്ങിയത്. വീട്ടുകാർ എത്ര ശ്രമിച്ചിട്ടും വിരൽ പുറത്തെടുക്കാൻ സാധിച്ചില്ല.
ഒടുവിൽ വീട്ടുകാർ കുട്ടിയുമായി ചാമക്കടയിലുള്ള അഗ്നിരക്ഷാസേനാ ഓഫിസിൽ എത്തി. ഇവർ നടത്തിയ ശ്രമവും വിഫലമായതോടെ കടപ്പാക്കടയിലെ യൂണിറ്റിൽ കൊണ്ടു വന്നു. കടപ്പാക്കട അഗ്നിരക്ഷാസേനയിലെ അസിസ്റ്റന്റ് സ്റ്റേഷൻ ഓഫിസർ ഇ.ഡൊമനികിന്റെ നേതൃത്വത്തിൽ കട്ടർ ഉപയോഗിച്ച് പാത്രം സാവധാനം മുറിച്ചു മാറ്റി.
