ഉലയാത്ത ആള്‍മരം: അച്ഛനെന്ന വാക്കിന് ഇനി ജോസഫ് എന്നുകൂടി അര്‍ത്ഥമുണ്ട്

joseph-father
SHARE

നിർവികാരമായിരുന്നു ആ കണ്ണുകൾ, പുറംകാഴ്ചയില്‍ നിസ്സഹായമായിരുന്നു ആ നില്‍പ്പ്.  അതിൽ പക്ഷേ ഒരു ദൃഢനിശ്ചയം നിറഞ്ഞുകത്തി.  നീനുവിന് ഇനി ആരുണ്ട് എന്ന ചോദ്യത്തിന് ഞാനുണ്ട്, ഈ അച്ഛനുണ്ട് എന്ന ഉത്തരമുണ്ട്. എല്ലാമെല്ലാമായ മകന്‍ തൊട്ടരികെ നിത്യനിദ്രയില്‍ നിശ്ചലനായി കിടക്കുമ്പോഴും തളരാത്ത കരുത്തിന്‍റെ ആള്‍രൂപമായി മലയാളിക്ക് മുന്നില്‍ ഈ അച്ഛന്‍.

മകന്റെ മരണത്തിലും മരുമകളുടെ കണ്ണീരിനുമിടയിൽ ആടിയുലയാതെ നിന്നു ജോസഫ് എന്ന അച്ഛൻ. കഴിഞ്ഞ പകലുകളില്‍ രാവുകളില്‍ ഒരുപോള കണ്ണടച്ചിട്ടുണ്ടാകില്ല ഈ മനുഷ്യന്‍. കെവിന്റെ മരണത്തോളം ഉള്ളുലച്ചതായിരുന്നു നീനുവിന്റെ കണ്ണുനീർ. ഒരു ദിവസം പോലും ഒരുമിച്ചുജീവിക്കാൻ സാധിക്കാതെ പകുതി പ്രാണൻ അകന്നുപോയ നീനുവിന് താങ്ങും തണലുമായത് ഈ അച്ഛന്‍. വേദനകളില്‍ പതറാതെ മുറുക്കിപ്പിടിച്ച കൈകളില്‍ ആ സങ്കടങ്ങളെയാകെ അദ്ദേഹം മുറുക്കിപ്പിടിച്ചു. 

പ്രാണൻ നഷ്ടപ്പെട്ട പ്രിയപ്പെട്ടവനെയോർത്ത് പൊട്ടിപ്പൊട്ടിക്കരയുന്ന ആ പെൺകുട്ടിയെ ചേർത്തുനിറുത്തി ജോസഫ് പറയാതെ പറഞ്ഞുകൊണ്ടേയിരുന്നു:  തളരരുത്, കരയരുത്, ഇനി അച്ഛനുണ്ട് കൂടെ. കുടുംബത്തെ മുഴുവൻ ചേർത്തുപിടിച്ച് വന്നുചേർന്ന വിധിയിൽ നിർവികാരനായി ഇരിക്കുന്ന ജോസഫിന്റെ ഈ ചിത്രം ഉള്ളുപൊള്ളിക്കുന്നതാണ്. 

നീനുവിന്റെ കണ്ണുനീർ വീണുപൊള്ളിയത് മകന്റെ മരണത്തിൽ നിസഹായനായി പോയ ആ അച്ഛന്റെ നെഞ്ചിലായിരുന്നു. ഒരു കുടുംബത്തിന്റെ മുഴുവൻ സ്വപ്നങ്ങളാണ് കെവിന്റെ മരണത്തോടെ ഇല്ലാതെയായത്. പെങ്ങളെ വിവാഹം കഴിപ്പിക്കണം, സ്വന്തമായൊരു വീടുവേണം, വൃദ്ധരായ അച്ഛനും അമ്മയ്ക്കും തണലാകണം, നീനുവിന് കൂട്ടാകണം.. അങ്ങനെ അങ്ങനെ നൂറുസ്വപ്നങ്ങൾ ബാക്കിയാക്കിയാണ് കെവിൻ പോയത്. ജീവിതത്തിന്‍റെ വല്ലാത്തൊരു ഘട്ടത്തില്‍ ആ സ്വപ്നങ്ങളെല്ലാം ഇനിയീ അച്ഛന്‍റെ ചുമലിലാകുന്നു. 

neenu-new

കെവിനെ കാണാതായ അന്നുമുതൽ നീനുവിനൊപ്പം തന്നെ നിന്നത് ജോസഫാണ്. കെവിന്റെ മരണവാർത്തയറിഞ്ഞ് തളർന്നുവീണ നീനുവിന് ആശുപത്രിയിൽ കൂട്ടിരുന്നു, ജന്മം നൽകിയ അച്ഛൻ നൽകിയ ആജീവനാന്ത കണ്ണീർ തന്നാലാവുന്ന വിധം ഈ അച്ഛൻ തുടച്ചുകൊടുത്തു. മകന്റെ മൃതദേഹത്തിന്റെയും മകളുടെ കണ്ണീരിന്റെയും ഇടയ്ക്ക് നിസഹായത മാത്രമായിരുന്നു അദ്ദേഹത്തിന് കൂട്ട്. എങ്കിലും തളരാതെ പിടിച്ചു നിന്നു. 

അമ്മ വിളമ്പി കൊടുത്ത ചോറുണ്ട്, അനിയത്തിയോട് പോയി വരാം എന്നു പറഞ്ഞിറങ്ങിയത് ആ വീടിന്റെ പ്രതീക്ഷയായിരുന്നു. ഒരിക്കലും തിരിച്ചുവരാത്ത യാത്രപോയ കെവിനെയോർത്തുള്ള കണ്ണീരായിരുന്നു നാടുമുഴുവൻ. ആ കണ്ണീർത്തിരയിലും ആടിയുലയാതെ പിടിച്ചുനിന്നത് ജോസഫ് മാത്രം. അതുകൊണ്ടുതന്നെ മലയാളനാട് മുഴുവന്‍ ഈ അച്ഛന് മുന്നില്‍ എഴുന്നേറ്റുനില്‍ക്കുന്നു. അങ്ങാടികളില്‍ ഫ്ലെക്സ് ബോര്‍ഡുകളായും സമൂഹമാധ്യമങ്ങളില്‍ ചെറുകുറിപ്പുകളായും ഈ അച്ഛന്‍ നിറഞ്ഞുകവിയുന്നു. ഈ മുഖം കാണുമ്പോള്‍ ഉറങ്ങാന്‍ കഴിയുന്നില്ലെന്ന് ഫെയ്സ്ബുക്കിന്‍റെ ചുമരില്‍ കുറിച്ചിട്ടു എത്രയോപേര്‍. 

neenu-sad

ഈ അച്ഛന്‍റെ ദൃഢപേശികളില്‍ പുതിയ കേരളത്തെ സ്വപ്നം കാണുന്നു ആ കുറിപ്പുകള്‍. ജാതിക്കും മതത്തിനും വിശ്വാസങ്ങള്‍ക്കും എല്ലാം മേലെ സ്നേഹവും പ്രണയവും ജീവിതവും നിറയുന്ന കാലം സ്വപ്നം കാണാന്‍ പ്രേരിപ്പിക്കുന്നു ഈ മുഖം. കരുത്തിന്‍റെ ആള്‍രൂപമായി വര്‍ഷങ്ങളിലേക്ക് നീളട്ടെ ഇനി ഈ മനുഷ്യന്‍റെ ശ്വാസനിശ്വാസങ്ങള്‍.  

MORE IN SPOTLIGHT
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.