ഇന്ത്യന്‍ ക്രിക്കറ്റ് ടീം ജേഴ്സിയില്‍ ഭാരത് എന്ന് ഉപയോഗിക്കണം എന്ന അഭിപ്രായം പങ്കുവച്ച സേവാഗിനെ പരിഹസിച്ചും പിന്തുണച്ചും വിമര്‍ശിച്ചും ഒട്ടേറെ പേര് രംഗത്തുവന്നിരുന്നു. ഇതിന് പിന്നാലെ വിശദീകരണക്കുറിപ്പുമായി രംഗത്തുവന്നിരിക്കുകയാണ് അദ്ദേഹം. താന്‍ പറഞ്ഞില്‍ രാഷ്ട്രീയം കാണുന്നത് വലിയ തമാശയാണെന്നും താനൊരു പാര്‍ട്ടിയുടെയും ആരാധകനല്ലെന്നും അദ്ദേഹം കുറിച്ചു
‘എല്ലാ രാഷ്ട്രീയപാര്‍ട്ടികളിലും നല്ല ആളുകളുമുണ്ട് മോശം ആളുകളുമുണ്ട്. എനിക്ക് ഒരു രാഷ്ട്രീയതാല്‍പര്യങ്ങളുമില്ല. ഉണ്ടായിരുന്നെങ്കില്‍ കഴി‍ഞ്ഞ ലോക്സഭാ തിരഞ്ഞെടുപ്പുകളില്‍ എനിക്ക് സീറ്റ് ഓഫര്‍ ചെയ്ത് രണ്ടു പാര്‍ട്ടികളും സമീപിച്ചിരുന്നു. ക്രിക്കറ്റിലെ എന്റേ നേട്ടങ്ങളാണ് ടിക്കറ്റ് ലഭിക്കാന്‍ കാരണം. പക്ഷേ ഞാന്‍ സ്വീകരിച്ചില്ല. ‘ഭാരത്’ എന്നത് എന്റെ വ്യക്തിപരമായ അഭിപ്രായവും ഇഷ്ടവുമാണ്. കോൺഗ്രസ് പോലും നടത്തിയ യാത്രയുടെ പേര് ഭാരത് ജോഡോ യാത്ര എന്നായിരുന്നു. ‘ഭാരതം’ എന്ന പേരിൽ നമ്മളെ ഒരു രാജ്യമായി അഭിസംബോധന ചെയ്താൽ അത് വലിയ സംതൃപ്തിയും സന്തോഷവും നല്‍കുന്ന കാര്യമാണ്’ സേവാഗ് കുറിച്ചു.
ഭാരത് എന്ന പേര് ഔദ്യോഗികമായി തന്നെ പുനഃസ്ഥാപിക്കേണ്ട സമയമാണിതെന്നാണ് സേവാഗിന്റെ നിലപാട്. ‘നമ്മിൽ അഭിമാനം നിറയ്ക്കുന്ന പേരായിരിക്കണമെന്നു ഞാന്‍ എന്നും വിശ്വസിച്ചിരുന്നു. നമ്മളെല്ലാം ഭാരതീയരാണ്. ഇന്ത്യയെന്ന പേരു നൽകിയതു ബ്രിട്ടീഷുകാരാണ്. ഭാരത് എന്ന ശരിയായ പേരിലേക്കു മടങ്ങിപ്പോകുന്നത് ഏറെ വൈകിയിരിക്കുന്നു.’ സേവാഗ് ഇന്നലെ കുറിച്ചിരുന്നു.
