ഹെലികോപ്റ്റര് അപകടത്തില് കൊല്ലപ്പെട്ട ബാസ്ക്കറ്റ് ബോള് ഇതിഹാസം കോബി ബ്രയന്റിനായി കണ്ണീരൊഴുക്കി കായികലോകം
ഹെലികോപ്റ്റര് അപകടത്തില് കൊല്ലപ്പെട്ട ബാസ്ക്കറ്റ് ബോള് ഇതിഹാസം കോബി ബ്രയന്റിനായി കണ്ണീരൊഴുക്കി കായികലോകം. കോബിയോടുള്ള ആദരസൂചകമായി ഇന്നത്തെ എല്.എ ലേക്കേഴ്സ് – എല്.എ ക്ലിപ്പേഴ്സ് ബാസ്ക്കറ്റ്ബോള് മല്സരം റദ്ദാക്കി.
കോബിയുടെ എട്ടാം നമ്പര് ലേക്കേഴ്സ് ജേഴ്സിയണിഞ്ഞ് കണ്ണീരോടെയാണ് ഓസ്ട്രേലിയന് ഓപ്പണ് ടെന്നിസ് മല്സരത്തിനായി നിക്ക് കീറിയോസ് കോര്ട്ടിലെത്തിയത്. കോബിയുടെ ഒര്മകള് എന്നെന്നും ഹൃദയത്തിലുണ്ടാകുമെന്ന് മല്സരശേഷം ടെന്നിസ്താരം റാഫേല് നദാല് കുറിച്ചു .
ഇതിഹാസങ്ങളുടെ സമൂഹമാധ്യമങ്ങള് കോബിക്കുള്ള സന്ദേശങ്ങളും ചിത്രങ്ങളും കൊണ്ട് നിറഞ്ഞു. കോബിക്കും മകള് ജിയാനയ്ക്കുമുള്ള സന്ദേശമെഴുതിയാണ് ലോകമെമ്പാടുമുള്ള കായികതാരങ്ങള് കളത്തിലിറങ്ങിയത്. എന് ബി എ ലോഗോയില് കോബിയുടെ ചിത്രപതിക്കണമെന്ന പെറ്റിഷനില് ലക്ഷങ്ങളാണ് ഒപ്പുവച്ചത്.