തിരുവനന്തപുരം കാര്യവട്ടത്തെങ്കിലും മലയാളിതാരം സഞ്ജു സാംസണെ കളിപ്പിക്കുമെന്ന പ്രതീക്ഷയിലായിരുന്നു മലയാളി ആരാധകർ. മത്സരത്തിന് മുൻപ് സഞ്ജു ഗ്രൗണ്ടിൽ പരിശീലനത്തിനിറങ്ങിയപ്പോഴും ആ പ്രതീക്ഷയില്‍ ആരാധകർ ഗാലറിയിലിരുന്ന് ആർത്തുവിളിച്ചു. എന്നാൽ ടീം ഇലവനെ പ്രഖ്യാപിച്ചപ്പോൾ സഞ്ജു പുറത്ത്, പന്ത് അകത്ത്.
കലിപ്പിലായ ആരാധകർ മത്സരത്തിലുടനീളം പന്തിനെ കൂവി വിളിച്ചു. പന്ത് ബാറ്റിങ്ങിനിറങ്ങിയപ്പോഴും വിക്കറ്റ് കീപ്പിങ് ചെയ്യുമ്പോഴുമെല്ലാം ആരാധകർ കൂവി വിളിച്ചു.
ഒടുവിൽ ക്യാപ്റ്റൻ വിരാട് കോലി ഇടപെട്ടു. ഗാലറിക്കരികിൽ ഫീൽഡിങ്ങിന് എത്തിയപ്പോൾ എന്താണിത് എന്ന തരത്തിൽ കോലി കൈകൊണ്ട് ആംഗ്യം കാണിച്ചു. കൂവി വിളിക്കുന്നതിന് പകരം കയ്യടിക്കാൻ കോലി ആവശ്യപ്പെട്ടു.
സഞ്ജുവിനെ ഒഴിവാക്കിയതിൽ ആരാധകർ സോഷ്യല്‍ മീഡിയയിൽ പ്രതിഷേധമുയര്‍ത്തി.
