സ്പാനിഷ് ലാലിഗയിൽ ഹാട്രിക് നേടാമെന്ന മോഹവുമായി കളിക്കാനിറങ്ങിയ ബാഴ്സ ഞെട്ടി. കളി തീരാൻ വെറും ഒരു മിനിറ്റ് മാത്രം ശേഷിക്കെ അത്ലറ്റിക് ബിൽബാവോ താരം അദൂരിസ് കാലിൽ പന്ത് കൊരുത്തു. ഉഗ്രനൊരു ബൈസിക്കിൾ കിക്ക്. ദുർബലരെന്ന് മുദ്ര കുത്തപ്പെട്ട ബിൽബാവോയ്ക്ക് മിന്നും ജയം. അവസാന നിമിഷം മത്സരം കൈവിട്ടു പോകുന്നത് കണ്ട് തരിച്ച് നിൽക്കാനേ ബാഴ്സ.
പകരക്കാരനായി ഇറങ്ങിയ അദൂരിസ് നേടിയ ഗോളിന് ഇരട്ടിമധുരമാണ്. ഈ സീസണോടെ കരിയർ അവസാനിപ്പിക്കുകയാണെന്ന് അദൂരിസ് നേരത്തേ തന്നെ പ്രഖ്യാപിച്ചിരുന്നു. പരിക്കിനെ തുടർന്ന് മെസി ഇറങ്ങിയില്ലെങ്കിലും ലൂയി സുവാരസും ഗ്രീസ്മാനും ബാഴ്സയ്ക്കായി കളിച്ചു. മിന്നും താരങ്ങൾ നിറഞ്ഞ മത്സരം പക്ഷേ ഇനി ഓർമ്മിക്കപ്പെടുക മുപ്പത്തിയെട്ടുകാരൻ അദൂരിസിന്റെ പേരിലാവും.
മത്സരത്തിനിടെ പരിക്കേറ്റ് സുവാരസ് തിരിച്ചു കയറിയിരുന്നു. കൂടുമാറിയെത്തിയ ഗ്രീസ്മാന്റെയും ഫ്രാങ്കി ഡി ജോങിന്റെയും ബാഴ്സയ്ക്കായുള്ള അരങ്ങേറ്റം കൂടിയാണ് അപ്രതീക്ഷിത തോൽവിയിൽ മുങ്ങിപ്പോയത്.
