കളി തുടങ്ങുന്നതിനു മുൻപു തന്നെ മരണക്കളി തുടങ്ങിക്കഴിഞ്ഞ മട്ടാണ് ലണ്ടനിലെ കെന്നിങ്ടൻ ഓവൽ സ്റ്റേഡിയത്തിന്. ക്രിക്കറ്റ് ലോകകപ്പിന്റെ ഉദ്ഘാടനമത്സരത്തിന്റെ വേദിയായ ഇവിടെ ക്രിക്കറ്റ് പ്രേമികളുടെ തിരക്കാണ്.
നാട്ടുകാരായ ഇംഗ്ലിഷുകാർ മുതൽ ലോകക്രിക്കറ്റിലെ കുഞ്ഞൻമാരായ അഫ്ഗാനിസ്ഥാനിൽനിന്നുള്ള ആരാധകർ വരെ ലോകകപ്പ് മത്സരങ്ങളുടെ ടിക്കറ്റിനു വേണ്ടി ഓടി നടക്കുകയാണ്. ഈ വരുന്ന വ്യാഴാഴ്ച ആതിഥേയരായ ഇംഗ്ലണ്ടും ദക്ഷിണാഫ്രിക്കയും തമ്മിലുള്ള പോരാട്ടത്തോടെയാണ് ലോകകപ്പിനു തുടക്കമാവുക. പക്ഷേ,അതിനു മുൻപു തന്നെ ഇംഗ്ലണ്ടും വെയിൽസും ക്രിക്കറ്റ് ജ്വരത്തിന്റെ പിടിയിലമർന്നു കഴിഞ്ഞു.ഓരോ മത്സരവേദിയിലേക്കും ആരാധകർ ഇരമ്പിയെത്തുമെന്നുറപ്പ്. കളികൾ കൂടി ഗംഭീരമായാൽ പിന്നെ ഒന്നര മാസം ആഘോഷം തന്നെ.