പന്ത് തുടരെ വേലിക്കെട്ടിനു പുറത്തേക്കു പായുന്നത് കാണാൻ രസമാണ്. എന്നാൽ പന്തെറിയുന്ന ബോളർക്ക് അതത്ര സുഖമുള്ള കാര്യമല്ല. പന്ത് തുടർച്ചയായി ഗാലറിയിൽ പോയി പതിക്കുമ്പോൾ നിയന്ത്രണം വിടുന്ന ബോളർമാരുടെ കാഴ്ച ക്രിക്കറ്റിൽ പതിവാണ്. ഐപിഎല്ലിൽ പ്രത്യേകിച്ചും.
ചെന്നൈ സൂപ്പർ കിംങ്സ് – സൺറൈസേഴ്സ് ഹൈദരാബാദ് മത്സരത്തിൽ അസ്വസ്ഥത പ്രകടിപ്പിച്ചത് റാഷീദ് ഖാനാണ്. ഉജ്വല ഫോമിലായിരുന്ന ഷെയ്ൻ വാട്സണന്റെ ബാറ്റിൽ നിന്നും റൺ പ്രവാഹമായിരുന്നു മത്സരത്തിൽ കണ്ടത്. 53 പന്തുകളിൽ നിന്നും 96 റൺസാണ് താരം നേടിയത്. മത്സരത്തിൽ കണക്കിന് പ്രഹരം കിട്ടിയത് റാഷീദ് ഖാനും സന്ദീപിനുമായിരുന്നു. നാലു ഓവറുകളിലായി 44 റൺസാണ് റാഷിദ് വിട്ടു കൊടുത്തത്. ഇതിനിടെ വാട്സനോടു കോർക്കാനും ഖാൻ മുതിർന്നു. വാട്സന് സമീപമെത്തി തുറിച്ചു നോക്കി എന്തോ പിറുപിറുത്ത റാഷിദ് ഖാൻ പതുക്കെ ശരീരത്തിൽ ഒന്നുരസിയാണ് കടന്നു പോയത്. വാട്സൺ പക്ഷെ അത് കണ്ട ഭാവം നടിച്ചില്ല. ഖാന്റെ പെരുമാറ്റത്തിനെതിരെ വിമർശമുയരുന്നിട്ടുണ്ട്.
മത്സരത്തിൽ ചെന്നൈ സൂപ്പർ കിങ്സ് ആറു വിക്കറ്റ് ജയവുമായി പോയിന്റ് പട്ടികയിൽ ഒന്നാം സ്ഥാനം തിരിച്ചു പിടിച്ചു.
