ലോകകപ്പ് ഫുട്ബോളില് സമീപകാലത്തെങ്ങുമില്ലാത്ത ഫോമിലാണ് ഇംഗ്ളണ്ട് ടീം. എല്ലാ ടൂര്ണമെന്റുകളിലും അല്പായുസില് ഒടുങ്ങാനായിരുന്നു എന്നും ഇംഗ്ളീഷ് പടയുടെ വിധി. എന്നാല് റഷ്യയില് ആരാധകര് കണ്ടത് ഒരു പുതിയ നിരയെ ആണ്. കൃത്യമായ ആസൂത്രണവും ഫിനിഷിങ്ങും ഇവരുടെ മുതല്ക്കൂട്ടാണ്. ഹാരി കെയ്ന് – ഡെലെ അലി – ട്രിപ്പിയര് ത്രയം കോരിത്തരിപ്പിക്കുന്ന പ്രകടനമാണ് കാഴ്ച വയ്ക്കുന്നത്.
എന്താണ് ഇംഗ്ളണ്ട് ടീമിന്റെ ഈ മികവിനു കാരണം ?. കോച്ചിന്റെ ബുദ്ധിയോ , പരിശീലനത്തിലെ ആസൂത്രണമോ ?. കായികലോകത്തിന്റെ ഈ ചോദ്യത്തിനു ഉത്തരമായി പുറത്തു വന്നത് ഒരു വിഡിയോ ആണ്. വിഡിയോയില് എന്താണെന്നല്ലേ രസകരം. ഒരു റബര് കോഴിയെ എറിഞ്ഞു കളിക്കുന്ന താരങ്ങളുടെ വിഡിയോ ആണ് പുറത്തു വന്നിരിക്കുന്നത്. പരിശീലന വേളയില് കളിക്കാര് ഈ റബര് കോഴിയെ എറിഞ്ഞു തകര്ക്കുകയാണ്. ഇതിലൂടെ കളിക്കാരുടെ ശാരീരിക–മാനസികാരോഗ്യം വര്ധിക്കുമെന്നാണ് ടീം അധികൃതര് പറയുന്നത്. ലോകകപ്പില് ഇതുവരെയുള്ള ടീമിന്റെ ഉണര്വിനു കാരണം ഈ നേരമ്പോക്കാണെന്നും പറയുന്നു. എന്തായാലും റബര് ചിക്കന് ഇഫക്ട് ഇന്ന് ക്രൊയേഷ്യയ്ക്കെതിരേയും തുണയ്ക്കുമോ എന്നു കണ്ടറിയണം.