പ്രോസിക്യൂഷനെ സ്വാധീനിച്ച് കേസ് ഒഴിവാക്കാമെന്ന് വിശ്വസിപ്പിച്ച് പ്രതിയില് നിന്ന് 25ലക്ഷം, രൂപ തട്ടിയ അഭിഭാഷകനെതിരെ പൊലീസ് കേസ് . ഡിജപി മഞ്ചേരി ശ്രീധരന്നായര് നല്കിയ പരാതിയുടെ അടിസ്ഥാനത്തിലാണ് ഹൈക്കോടതി അഭിഭാഷകനായ അഡ്വക്കറ്റ് കെപി മുജീബിനെതിരെ എറണാകുളം സെന്ട്രല് പൊലീസ് കേസെടുത്തത് . വിതുരയില് പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച കേസിലെ പ്രതി മുന് ഇമാം ഷെഫിക് അല് ഖാസിമിയുടെ ബന്ധുവില് നിന്നാണ് ഇയാള് പണം വാങ്ങിയത്.
രണ്ട് പരാതികളിലാണ് അഡ്വക്കറ്റ് കെ പി മൂജീബിനെതിരെ എറണാകുളം സെന്ട്രല് പൊലീസ് കേസെടുത്തിട്ടുള്ളത് . ഡയറക്ടര് ജനറല് പ്രോസിക്യൂഷന് മഞ്ചേരി ശ്രീധരന് നായരും പീഡനക്കേസിലെ പ്രതി ഷെഫീക്ക് അല് ഖാസിമിയും വെവ്വേറെ പരാതികളാണ് എറണാകുളം സെന്ട്രല് സ്റ്റേഷനില് നല്കിയിട്ടുള്ളത് . പീഡനക്കേസില് നിന്ന് ഒഴിവാക്കാന് പ്രോസിക്യൂഷന് ഡയറക്ടര്ക്ക് പണം നല്കണമെന്ന് വിശ്വസിപ്പിച്ചാണ് ഷെഫീഖ് അല് ഖാസമിയുടെ സഹോദരനില് നിന്ന് അഭിഭാഷകന് പണം വാങ്ങിയത് . ആദ്യഘട്ടത്തില് പത്ത് ലക്ഷം രൂപ വാങ്ങി . തുടര്ന്ന് അഞ്ച് തവണകളായി പതിനഞ്ച് ലക്ഷരൂപയും കൈപ്പറ്റി . അറസ്റ്റിലായ ഷഫീഖിന്റെ വാഹനം പുറത്തിറക്കാമെന്ന് അറിയിച്ച് മുദ്രപ്പത്രങ്ങളിലും ഒപ്പിടുവിച്ചു. അതിനുശേഷം കാര് കൈവശപ്പെടുത്താന് ശ്രമിച്ചെന്നുമാണ് പൊലീസ് ഫയല് െചയ്ത എഫ് ഐ ആറില് രേഖപ്പെടുത്തിയിട്ടുള്ളത് .