അനുകരണ കലയിലൂടെ സമൂഹമാധ്യമങ്ങളിൽ താരമാണ് കട്ടപ്പന പുളിയൻമല സ്വദേശിനി ദേവനന്ദ രതീഷെന്ന അഞ്ചാം ക്ലാസ്സുകാരി. സിനിമാ താരങ്ങളെയും ആരോഗ്യ മന്ത്രി കെ.കെ.ശൈലജയുടേയുമൊക്കെ ഭാവങ്ങൾ തന്മയത്വത്തോടെയാണ് ഈ മിടുക്കി അനുകരിക്കുന്നത്.
മോഹന്ലാൽ ചിത്രം കന്മദത്തിൽ കെ പി എസി ലളിത അവതരിപ്പിച്ച കഥാപാത്രത്തെ മിഴിവോടെ അവതരിപ്പിച്ചിരിക്കുകയാണ് ദേവനന്ദ. വിഡിയോ കണ്ട കെ പി എ സി ലളിത, ദേവനന്ദയെ ഫോണിൽ വിളിച്ച് അഭിനന്ദിച്ചു. ദേവാസുരത്തിൽ രേവതി അനശ്വരമാക്കിയ ഭാനുപ്രിയ എന്ന കഥാപാത്രത്തേയും, കിലുക്കത്തിൽ ഇന്നസെന്റ് അവതരിപ്പിച്ച കിട്ടുണ്ണിയെയും ദേവനന്ദ അനുകരിച്ചതും വൈറലായിരുന്നു.
ദേവനന്ദ രണ്ടു ടെലിഫിലിമുകളിലും അഭിനയിച്ചിട്ടുണ്ട്. ലോക്ക് ഡൌൺ കാലത്ത് സമൂഹമാധ്യമങ്ങളിൽ സംഘടിപ്പിച്ച അഭിനയ മത്സരങ്ങളിൽ 50ലധികം പുരസ്കാരങ്ങളും ഈ മിടുക്കി സ്വന്തമാക്കിയിട്ടുണ്ട്. ഭാവിയില് അഭിനേത്രിയാകണമെന്നാണ് ഈ അഞ്ചാംക്ലാസുകാരിയുടെ ആഗ്രഹം. ചുമട്ടു തൊഴിലാളിയായ പിതാവ് രതീഷും അമ്മ മായയും സഹോദരങ്ങളും അകമഴിഞ്ഞ പിന്തുണയാണ് ഈ കൊച്ചുമിടുക്കിക്ക് നല്കുന്നത്.