ഒന്നര ദശാബ്ദക്കാലം മുൻപ് പൂട്ടിപ്പോയതാണ് പ്ലാച്ചിമടയിലെ കൊക്ക കോള കമ്പനി. കേരളത്തിന്റെ സമരചരിത്രം അറിയുന്നവർക്കും മനുഷ്യരുടെ അതിജീവനവുമായി ബന്ധപ്പെട്ട സമരത്തിൽ പങ്കെടുത്തവർക്കും സുപരിചിതമാണ് പ്ലാച്ചിമട. ലോകത്തിന്റെ സമരചരിത്രത്തിൽ തന്നെ ഇടം നേടിയ സ്ഥലം. പ്ലാച്ചിമടയിൽ നിന്നാണ് ഈ ലക്കം ചൂണ്ടുവിരൽ. അതിനൊരു കാരണമുണ്ട്. അതിജീവനത്തിനുവേണ്ടി ജനങ്ങൾ തെരുവിലിറങ്ങി പോരാടിയപ്പോഴാണ് ലോകത്തിലെ ഒരു ഭരണാധികാരിക്ക് മുന്നിലും കീഴടങ്ങാത്ത കമ്പനിക്ക് ഗേറ്റും പൂട്ടി മടങ്ങേണ്ടി വന്നത്. എന്നാല്‍ ഇന്നിതാ, മുഖം മിനുക്കി പിൻവാതിലിലൂടെ കൊക്ക കോള പ്ലാച്ചിമടയിലേക്ക് തിരികെയെത്താൻ ശ്രമിക്കുകയാണ്.
