നിർഭയയ്ക്ക് നേരിടേണ്ടി വന്ന ക്രൂരപീഡനത്തിന് സമാനമായി ജാർഖണ്ഡിലും കൂട്ടബലാൽസംഗം. ഛത്ര ഗ്രാമത്തിലാണ് 50 കാരിയെ മൂന്ന് യുവാക്കൾ കൂട്ടബലാൽസംഗത്തിനിരയാക്കിയത്. ഇവരുടെ സ്വകാര്യഭാഗത്ത് സ്റ്റീൽ ഗ്ലാസ് കുത്തിക്കയറ്റിയതായും ദേശീയ മാധ്യമങ്ങൾ റിപ്പോർട്ട് ചെയ്യുന്നു.
വ്യാഴാഴ്ചയാണ് രാജ്യത്തെ നടുക്കിയ സംഭവം ഉണ്ടായത്. വെളിമ്പ്രദേശത്ത് വിസർജനത്തിനായി പോയ സ്ത്രീയെ മൂന്ന് പുരുഷൻമാർ തട്ടിക്കൊണ്ട് പോകുകയായിരുന്നു. സംഘം ചേർന്ന് ക്രൂരമായി പീഡിപ്പിച്ച ശേഷം ഇവരുടെ സ്വകാര്യഭാഗത്ത് സ്റ്റീൽ ഗ്ലാസും കയറ്റി. പുറത്ത് പറഞ്ഞാൽ കൊന്ന് കളയുമെന്നും ഭീഷണിപ്പെടുത്തി.
മണിക്കൂറുകൾ കഴിഞ്ഞിട്ടും സ്ത്രീയെ കാണാതായതോടെ കുടുംബാംഗങ്ങൾ തിരച്ചിൽ തുടങ്ങി. തുടർന്നാണ് രക്തത്തിൽ കുളിച്ചു കിടക്കുന്ന നിലയിൽ ഇവരെ കണ്ടെത്തിയത്. ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. ഇവിടെ നിന്ന് ഇവരെ ഗയയിലെ മെഡിക്കൽ കോളെജിലേക്ക് മാറ്റി. ജീവനായി മല്ലിടുകയാണ് സ്ത്രീയെന്ന് ആശുപത്രി അധികൃതർ പറയുന്നു.
കേസിൽ രണ്ടു പേരെ പൊലീസ് അറസ്റ്റ് ചെയ്തു. മൂന്നാമൻ ഒളിവിലാണ്. ഇയാളെ ഉടൻ തന്നെ പിടികൂടുമെന്നും അർഹിക്കുന്ന ശിക്ഷ നൽകാനുള്ള നിയമ നടപടികൾ സ്വീകരിക്കുമെന്നും പൊലീസ് വ്യക്തമാക്കി.
